संगमनेर: देशाच्या संरक्षणासाठी स्वतःच्या जीवाची पर्वा न करता निस्वार्थीपणे काम करणाऱ्या सर्व माजी सैनिकांचा उचित सन्मान व्हावा यासाठी राज्य राज्यातील आघाडी सरकारने नगरपालिका कार्यक्षेत्रात राहणाऱ्या माजी सैनिक व त्यांच्या विधवा पत्नी यांना मालमत्ता करात पूर्ण सूट देण्याचा निर्णय घेतला असून महसूलमंत्री नामदार बाळासाहेब थोरात व आमदार डॉक्टर सुधीर तांबे यांच्या मार्गदर्शनाखाली संगमनेर नगरपरिषदेकडून तातडीने अंमलबजावणी करण्यात आली असल्याची माहिती नगराध्यक्ष सौ दुर्गाताई तांबे यांनी दिली आहे.
या योजनेची माहिती देताना सौ दुर्गाताई तांबे म्हणाल्या की, माजी सैनिकांनी देशासाठी प्राणाची बाजी लावली असून जीवाची पर्वा न करता देशाचे संरक्षण केले आहे. त्यांची देशसेवा लक्षात घेऊन त्यांना उचित सन्मान व्हावा यासाठी राज्याचे मुख्यमंत्री नामदार उद्धव ठाकरे, महसूल मंत्री नामदार बाळासाहेब थोरात, उपमुख्यमंत्री अजित पवार आणि मंत्रिमंडळाने मा.बाळासाहेब ठाकरे माजी सैनिक व त्यांच्या विधवा पत्नीला मालमत्ता कर माफी योजना अंतर्गत पूर्णपणे मालमत्ता व घरपट्टी माफ करण्याचा निर्णय घेतला आहे. याची अंमलबजावणी संगमनेर नगरपरिषदेने प्रथम सुरुवात केली आहे. शासनाच्या विविध योजना अत्यंत प्रभावीपणे व तातडीने राबवून संगमनेर नगर परिषदेने कायमचं सामान्य नागरिकांना दिलासा दिला आहे.
स्वच्छ संगमनेर,सुंदर संगमनेर या उपक्रमा बरोबर संगमनेर शहरातील कोरोना चे संकट रोखण्यासाठी नगर परिषदेने केलेल्या विविध प्रभावी उपाय योजनांमुळे नागरिकांना चांगल्या सुविधा पुरवल्या जात आहेत. माजी सैनिकांचे कार्य लक्षात घेऊन नगराध्यक्षा सौ.दुर्गाताई तांबे यांनी मागील तीन वर्षापासून दिवाळीच्या वेळेस माजी सैनिकांना फराळ पाठविणे, रक्षाबंधनानिमित्त राख्या पाठविणे असे विविध उपक्रम राबविले आहेत. तसेच प्रत्येक गावोगावी माजी सैनिकांचा उचित सन्मान व्हावा यासाठी विविध कार्यक्रमांचे आयोजन केले आहे.
नगर परिषदेने घेतलेल्या या धोरणात्मक निर्णयामुळे माजी सैनिकांचा संगमनेर नगरपालिकेने सन्मान केला असून याकामी नगराध्यक्ष सौ दुर्गाताई तांबे, उपनगराध्यक्षा सौ सुमित्राताई दीडडी, सर्व सभापती, सर्व नगरसेवक, नगरसेविका व मुख्याधिकारी डॉ. सचिन बांगर यांनी तातडीने योजना राबवल्या बद्दल नागरिकांमधून व माजी सैनिकांमध्ये आनंदाचे वातावरण निर्माण झाले आहे.