देशी व विदेशी दारूसह, दुचाकी व रोख रक्कम पोलीसानी पकडली.

◻ कोठे बुद्रुक येथे घारगाव पोलिसांची दमदार कारवाई.

संगमनेर Live (राजू नरवडे) | संगमनेर तालुक्याच्या पठारभागातील कोठे बुद्रुक येथे घारगाव पोलिसांनी अवैद्य रित्या देशी व विदेशी दारूची चोरून विक्री करणाऱ्यास दुचाकी व रोख रकमेसह पकडले असून शनिवार दिनांक १० ऑक्टोबर रोजी सायंकाळी साडेसहा वाजेच्या सुमारास ही करण्यात आली आहे. त्यामुळे नागरिकांनी घारगाव पोलिसांचे कौतुक केले आहे.

याबाबत घारगाव पोलिसांनी दिलेली माहिती अशी की, कोठे बुद्रुक गावातील साहेबराव वाकळे हा शनिवारी पत्र्याच्या टपरीच्या आडोशाला दुचाकीच्या डिकीमध्ये विना परवाना व बेकायदेशीर रित्या चोरून देशी विदेशी दारूची विक्री करत असल्याची माहिती गुप्त खबऱ्या मार्फत घारगाव पोलिस ठाण्याचे पोलिस निरीक्षक अंबादास भुसारे यांना समजली. त्यामुळे त्यांच्या मार्गदर्शनाखाली पोलिस नाईक राजेंद्र लांघे, गणेश लोंढे, किशोर लाड, प्रमोद चव्हाण आदि पोलिसांनी घटनास्थळी धाव घेत देशी विदेशी दारूसह, दुचाकी व रोख रक्कम असा एकून ३२ हजार ५५४ रूपयांचा मुद्देमाल जप्त केला असून याप्रकरणी पोलिस काॅन्सटेबल किशोर लाड यांनी दिलेल्या फिर्यादी वरून घारगाव पोलिसांनी साहेबराव वाकळे याच्या विरूद्ध गुन्हा रजिस्टर नंबर ३७७/२०२० मु. प्रो. का. कलम ६५ (ई) प्रमाणे गुन्हा दाखल केला आहे. दरम्यान या गुन्ह्याचा पुढील तपास पोलिस निरीक्षक अंबादास भुसारे यांच्या मार्गदर्शनाखाली पोलिस नाईक राजेंद्र लांघे हे करत आहे.

पोलिसांनी केलेल्या या कारवाईमुळे नागरिकांनी त्यांचे कौतुक केले आहे. तर गावात चालणाऱ्या अवैद्य दारू विक्री व जुगार अड्यामुळे अनेकांचे संसार उध्वस्त झाले आहे. त्यामुळे अवैध दारू विक्री बंद व्हावी यासाठी काही दिवसांनपूर्वीच गावातील पोपट खंडू भालके यांनी ग्रामपंचायत कार्यालयासमोर आमरण उपोषण केले होते. या उपोषणाला महिलांनीही पाठिंबा दिला होता. याप्रसंगी अवैद्य दारू विक्री करणाऱ्यावर कडक कारवाई केली जाईल असे आश्वासन पोलिसांनी दिले होते. त्यानतंर भालके यांनी आमरण उपोषण मागे घेतले. त्यामुळे पोलिसांनी अवैध दारू विक्री करणाऱ्यावर गुन्हा ही दाखल केला  होता. त्यानंतर पुन्हा शनिवारी पोलिसांनी धडक कारवाई करत देशी व विदेशी दारूसह रोख रक्कम ही पकडल्याने नागरीकानी पोलीसाचे कौतुक केले आहे.