◻ वनकुटे येथील घटना ; आठ बकरे ठार तर तीन जखमी.
संगमनेर Live | अन्.. शेतकर्‍याचा नादच खुळा जीवाची पर्वा न करता मोठ्या धाडसाने बिबट्या शेळ्यांच्या खोलीत कोंडला असल्याची घटना संगमनेर तालुक्याच्या पठारभागातील वनकुटे येथे घडली असून प्रकाश रेवजी हांडे असे या धाडसी शेतकर्‍याचे नाव आहे.
याबाबत मिळालेली माहिती अशी की, वनकुटे गावाअंतर्गत असलेल्या कळमजाई वस्ती येथे प्रकाश रेवजी हांडे हे राहात असून त्यांचा शेळीपालनाचा व्यवसाय आहे. त्यांच्याकडे मोठ्याप्रमाणात शेळ्या असून नेहमी प्रमाणे त्यांनी शुक्रवारी सायंकाळी आपली सर्व बकरे एका खोलीत कोंडून त्यांनी बाहेरून दरवाज्याला कुलूप लावले होते. शुक्रवारी मध्यरात्री साडेबारा वाजेच्या सुमारास बिबट्या त्या ठिकाणी आला आणि त्याने कडी कोयंडा वाकून आत मध्ये प्रवेश केला आतमधील बकरांवर हल्ला करताच बकरे मोठ मोठ्याने ओरडू लागले त्यामुळे हांडे हे झोपेतून जागे झाले व घराच्या बाहेर आले आणि खोलीच्या दिशेने धाव घेत आत मध्ये जावून पाहीले तर समोर बिबट्या दिसला.
आतमध्ये बिबट्याने काही बकरांचा फडशा पाडला होता हे सर्व पाहून हांडे बाहेर येत असतानाच बिबट्याने त्यांच्याकडे धाव घेतली मात्र हांडे यांनी पटकन बाहेर येत जीवाची पर्वा न करता त्याला मोठ्या धाडसाने जेरबंद केले. घटनेची माहिती सामाजिक कार्यकर्तै सिताराम हांडे यांनी वनविभागाच्या अधिकार्‍यांना दिली. त्यामुळे माहिती समजताच वनविभागाचे वनपरिमंडल अधिकारी रामदास थेटे, वनरक्षक सुजाता टेंबरे, दिलीप बहिरट, बाळासाहेब वैराळ, आंथा काळे हे सर्व जण घटनास्थळी पिंजरा घेवून गेले. बिबट्याला जेरबंद करण्यासाठी वनविभागाने काही नागरिकांच्या मदतीने पिंजरा खोली जवळ लावला आणि जवळपास तीन ते चार तासांच्या अथक प्रयत्ना नंतर बिबट्या पिंजऱ्यात जेरबंद होताच नागरिकांनी सुटकेचा निश्वास सोडला.
बिबट्या मुळे आम्ही रात्र भर झोपलो नाही असेही यावेळी सामाजिक कार्यकर्ते सिताराम हांडे, पोलीस पाटील गुलाबराव पोखरकर, अशोक हांडे, सिताराम पांडुरंग हांडे, महेश हांडे, गणेश हांडे, गुलाब ईनामदार आदि शेतकर्‍यांनी सांगीतले आहे. दरम्यान जीवाची पर्वा न करता प्रकाश हांडे यांनी बिबट्याला जेरबंद केले आहे. त्यामुळे हांडे यांनी दाखवलेल्या धाडसाचे सर्वत्र कौतुक होत आहे.