◻ ग्रामस्थाच्या मदतीने वनविभागाने काढले बिबट्याला बाहेर.
संगमनेर Live | संगमनेर तालुक्यातील उंबरी बाळापूर शिवारातील सुंदरबापू बाळासाहेब शिंदे यांच्या घराजवळील विहीरीमध्ये बुधवारी मध्यरात्री बिबट्या पडला होता. गुरुवारी सकाळी ग्रामस्थाच्या मदतीने वनविभागाने या बिबट्याला विहीरीतून सुखरुप बाहेर काढले आहे.
याबाबत मिळालेली माहिती अशी की, बुधवारी मध्यरात्री १.३० वाजेच्या सुमारास शिकारीची शोधात बाहेर पडलेला बिबट्या हा अंदाज न आल्याने येथील शेतकरी सुंदरबापू बाळासाहेब शिंदे यांच्या गट नं - २१६ मध्ये असलेल्या विहीरीमध्ये पडला होता. सकाळी शिदें कुटुंबिय उठले असता विहीरीलगत कुत्रे मोठ्याने भुकंत सैरावैर पळत असल्याचे दिसल्याने सुंदरबापू शिंदे यानी विहीरीत डोकाऊन पाहिले असता त्याना एक बिबट्या विहिरीत पडलेला दिसला. त्यामुळे त्यानी तात्काळ गावातील सामाजिक कार्यकर्ते अशोक भुसाळ याना फोन करुन विहिरीत बिबट्या पडल्याची माहिती दिली. अशोक भुसाळ यानी तात्काळ वनविभागाचे कर्मचारी अशोक गिते याना घटनेची माहिती देऊन अशोक भुसाळ स्वतः घटनास्थळी दाखल झाले.
या घटनेची माहिती मिळताचं उपविभागीय वन अधिकारी संदीप पाटील यांचे मार्गदर्शानाखाली वनक्षेत्रपाल एस. एस. माळी, वनपाल पी. जे. पुंड, वनरक्षक एस. एम. पारधी, पडवळे, वाहन चालक बोऱ्हाडे, अशोक गीते, डेंगळे आदि कर्मचाऱ्यानी घटनास्थळाकडे धाव घेतली. यावेळी वनविभाग बिबट्याला विहिरीतून बाहेर काढण्यासाठी अथक प्रयत्न करत असताना गावातील सामाजिक कार्यकर्ते अशोक भुसाळ, भगवान मैड, अतुल भुसाळ, शिवम शिंदे, संपत भुसाळ, सुनील शिखरे, अनिल सारबंदे, सतीष भुसाळ, राजेद्रं निर्मळ, गोवर्धन उंबरकर, गोकुळ खेमनर, सत्यम भुसाळ, शुभम भुसाळ, विशाल भुसाळ आदिसह परिसरातील नागरिकांनी वनविभागाला मोलाची मदत केली.
दरम्यान या बिबट्याला ग्रामस्थाच्या मदतीने वनविभागाने विहिरीतुन सुखरुप बाहेर काढले असून हा अडीच ते तीन वर्षाचा मादी बिबट्या असल्याची माहिती वनविभागाने देऊन त्याला पुढील कार्यवाहीसाठी निबांळे रोपवाटिकेत हालवले आहे.