◻ तालुक्यातील ८ ग्रामपंचायतीच्या जागा बिनविरोध.
संगमनेर Live | संगमनेर उपविभागातील संगमनेर व अकोले या दोन्ही तालुक्यातील ९ ग्रामपंचायत जागांसाठी ८ मतदान केंद्रावर उद्या मंगळवार २१ डिसेंबर रोजी मतदान होणार असल्याची माहिती संगमनेर उपविभागीय अधिकारी शशिकांत मंगरुळे यांनी दिली.
संगमनेर येथे तहसीलदार अमोल निकम यांच्या नेतृत्वाखाली निवडणूक प्रक्रिया पार पडणार आहे. यात समनापूर, कुरकुटवाडी, ओझर खुर्द आश्वी बुद्रुक, वडगांवलांडगा या ५ ग्रामपंचायत जागेसाठी ५ मतदान केंद्रावर मतदान पार पडणार आहे. राज्य निवडणूक आयोगाच्या आदेशानुसार १९ जागांसाठी पोटनिवडणूक कार्यक्रम जाहीर झाला होता. बोरबन, म्हसवंडी व मिरपूर या ३ ग्रामपंचायतीमधील ५ जागांसाठी एकही अर्ज प्राप्त नाही. तर खराडी, चिंचपूर, मिर्झापूर, पळसखेडे, काकडवाडी, निमगांव टेंभी, कोंची मांची, निमगांवजाळी या ८ ग्रामपंचायतीच्या ८ जागा बिनविरोध करण्यात आल्या आहेत. प्रशासनाकडून ५ मतदान पथक व ३५ कर्मचाऱ्यांची नेमणूक करण्यात आली आहे. तर ५ पोलीस कर्मचारी नियुक्त करण्यात आले आहे. सकाळी ७.३० ते सायंकाळी ५.३० या कालावधीत ईव्हीएम मशीनद्ववारे मतदान पार पडणार आहे.
अकोले येथे तहसीलदार सतीश थेटे यांच्या नेतृत्वाखाली ही निवडणूक प्रक्रिया पार पडणार आहे. यात ४ ग्रामपंचायत जागांसाठी ३ मतदान केंद्रावर मतदान होणार आहे. यासाठी ४ मतदान पथके, प्रत्येक पथकात ६ कर्मचारी व याशिवाय २ राखीव पथके नियुक्त करण्यात आले आहेत. नागरिकांच्या मागासवर्ग प्रवर्गासाठी अकोले तालुक्यात एकाही जागेवर मतदान होणार नाही.
ही संपूर्ण निवडणूक प्रक्रिया सुरळीत पार पडण्यासाठी पोलीस बंदोबस्त देण्यात आला आहे. अशी माहिती उपविभागीय अधिकारी मंगरूळे यांनी दिली आहे.