◻ १४ जुलै पासुन व्दारकामाई मंदिर भाविकांना दर्शनासाठी खुले
संगमनेर Live (शिर्डी) | श्री साईबाबा संस्थान विश्वस्तव्यवस्था, शिर्डीच्या वतीने श्रींचे व्दारकामाई मंदिराचे दर्शनाच्या वेळेत बदल करण्यात आले असून दिनांक १४ जुलै २०२२ पासुन श्रींची शेजारती होईपर्यंत श्रींचे व्दारकामाई मंदिर भाविकांना दर्शनासाठी खुले राहणार असल्याची माहिती संस्थानच्या मुख्य कार्यकारी अधिकारी भाग्यश्री बानायत यांनी दिली.
श्रीमती बानायत म्हणाल्या, श्री क्षेत्र शिर्डी येथे देश-विदेशातुन लाखो भाविक श्री साईबाबांच्या समाधीच्या दर्शनाकरीता येत असतात. या ठिकाणी आल्यानंतर भाविक श्रींच्या समाधीसह व्दारकामाई, चावडी व गुरुस्थान आदी ठिकाणी प्राधान्याने दर्शनाकरीता जातात. त्यातच बाबांनी त्यांच्या हयातीत संपुर्ण जीवन हे व्दारकामाई येथे व्यथीत केले.
या ठिकाणाहुन बाबांनी अनेक भाविकांना शिकवण, उपदेश, गोर-गरीबांची रुग्ण सेवा व अन्न दिले. तसेच याठिकाणी बाबांनी असंख्य भाविकांना आपल्या लिला ही दाखवील्या. त्यामुळे व्दारकामाईस अनन्य साधारण महत्व आहे. त्याअनुषंगाने संस्थानच्या व्यवस्थापन समितीच्या नुकत्याच झालेल्या सभेत श्रींची शेजारती होईपर्यंत व्दारकामाई मंदिर साईभक्तांना दर्शनासाठी खुले ठेवण्याबाबतचा निर्णय घेण्यात आला.
त्यानुसार श्रींचे व्दारकामाई मंदिराच्या दर्शनाच्या वेळेत बदल करण्यात आला असून गुरुवार दिनांक १४ जुलै २०२२ पासुन पहाटे ०५.०० ते रात्रौ १०.३० (शेजारती होईपर्यंत) यावेळेत श्रींचे व्दारकामाई मंदिर भाविकांना दर्शनासाठी खुले ठेवण्यात येणार असल्याचे सांगुन भाविकांनी या सुविधेचा लाभ घ्यावा, असे आवाहन ही श्रीमती बानायत यांनी केले.
