प्रवरेच्या विद्यार्थ्यानी जागतिक पातळीवर संस्थेचा नावलौकिक वाढवला
◻️ सौ. शालिनीताई विखे पाटील यांचे कोल्हार येथील शाळेच्या ४८ व्या वर्धापन दिनी प्रतिपादन
◻️ माजी विद्यार्थ्याचा आदर्श घेऊन स्वप्न पुर्ण करण्याचे केले आवाहन
संगमनेर LIVE (कोल्हार) | पद्मश्री डॉ. विठ्ठलराव विखे पाटील यांनी सुरू केलेल्या प्रवरा ग्रामीण शिक्षण संस्थेची प्रवरा हायस्कूल ही एक नामांकित शाळा आहे. या शाळेतील विद्यार्थी, शिक्षक आणि पालकांनी एकमेकांच्या साह्याने उत्तम प्रगती साधली. विद्यार्थ्यानी येथील माजी विद्यार्थ्याचा आदर्श घेऊन पुढे जात आपले स्वप्न पुर्ण करावे असे प्रतिपादन जिल्हा परिषदेच्या माजी अध्यक्षा सौ. शालीनीताई विखे पाटील यांनी केले.
लोकनेते पद्मभूषण डॉ. बाळासाहेब विखे पाटील प्रवरा ग्रामीण शिक्षण संस्थेच्या कोल्हार येथील प्रवरा हायस्कूल या सीबीएसई शाळेच्या ४८ व्या वर्धापन दिनानिमित्त आयोजित कार्यक्रमात सौ. शालिनीताई विखे बोलत होत्या.
यावेळी प्रवरा सहकारी बँकेचे अध्यक्ष डॉ. भास्करराव खर्डे पाटील, माजी विद्यिर्थीनी सौ. अनिता हरिभाऊ खर्डे, सौ. कोमल वडीतके, अशोक असावा, संभाजी देवकर, प्रशांत खर्डे, गोरख खर्डे, आबासाहेब राऊत, प्रा. नंदकुमार दळे, सुनील शिंदे, प्राचार्य सुधीर मोरे यांच्यासह शिक्षक, पालक व विद्यार्थी उपस्थित होते.
सौ. विखे म्हणाल्या की, सीबीएसईचा अभ्यासक्रम नुकताच सुरू केलेल्या या शाळेने अल्पावधीतच उत्तम असे यश संपादन केले. मुलांनी माजी विद्यार्थ्याना आदर्श म्हणून ठेवावे. या शाळेचे विद्यार्थी देश परदेशामध्ये आपले आणि आपल्या कुटुंबाचे नाव मोठे करीत आहे. कोल्हार सारख्या ग्रामीण भागामध्ये प्रवरेने अत्यल्प फिमध्ये सर्वासाठी शिक्षण उपलब्ध करून दिलेले आहे. शाळेचे सर्व शिक्षक शिक्षकेतर कर्मचारी विद्यार्थ्यांच्या उन्नतीसाठी परिश्रम घेत असल्याबद्दल त्यांनी समाधान व्यक्त केले.
शाळेचे माजी विद्यार्थिनी आणि शाखाधिकारी स्टेट बँक ऑफ महाराष्ट्र अनिता खर्डे आणि बँक ऑफ इंडियाच्या कृृषी अधिकारी कोमल वडीतके यांनी देखील विद्यार्थ्यांना मार्गदर्शन करताना मेहनत, जिद्द त्याचप्रमाणे अज्ञाधारकपणा या गुणांचा आत्मसात करण्याचे सांगितले.
दरम्यान शाळेचे प्राचार्य सुधीर मोरे यांनी प्रास्ताविक केले. कार्यक्रमाचे सूत्रसंचालन कु. मिताली अंबुलगेकर आणि प्रा. प्रिया कडसकर यांनी केले. तसेच आभार कु. संस्कृती पानसरे हिने मानले.