विद्यार्थ्यांच्या कौशल्य विकास प्रशिक्षणाला प्राधान्य द्या - मंत्री विखे पाटील
◻️ मंत्री विखे पाटील यांच्या हस्ते दा. ज मालपाणी महाविद्यालयात ‘आपले सेवा केंद्रा’चे उद्घाटन
संगमनेर LIVE| पदवी शिक्षणा बरोबरच कौशल्य प्रशिक्षणाच्या संधी विद्यार्थ्यांना उपलब्ध करून देण्याची जबाबदारी शिक्षण संस्था चालकांना स्विकारावी लागेल. प्रवरा ग्रामीण शिक्षण संस्थेने कौशल्य शिक्षणा करीता ३७ कोर्सेस सुरू करून तयार केलेला ‘प्रवरा पॅटर्न’ इतर संस्थांनी स्विकारावा असे आवाहन महसूल तथा पालकमंत्री राधाकृष्ण विखे पाटील यांनी केले.
महसूल विभागाच्या वतीने शिक्षण प्रसारक संस्थेच्या दा. ज मालपाणी महाविद्यालयात विद्यार्थ्यांकरीता सुरू करण्यात आलेल्या आपले सेवा केंद्राचे उद्घाटन मंत्री विखे पाटील यांच्या हस्ते झाले.
संस्थेचे सचिव डॉ. अनिल राठी यांच्या अध्यक्षतेखाली झालेल्या कार्यक्रमास उद्योजक साहेबराव नवले, प्रांताधिकारी शैलेंद्र हिंगे, तहसिलदार धीरज मांजरे, प्राचार्य अरूण गायकवाड उपस्थित होते. मंत्री विखे पाटील यांच्या हस्ते प्रातिनिधीक स्वरुपात विद्यार्थ्यांना शासकीय दाखले वितरीत करण्यात आले.
आपल्या भाषणात मंत्री विखे म्हणाले की, विद्यार्थ्यांना आवश्यक असलेले शासकीय दाखले महाविद्यालयातच उपलब्ध व्हावेत या उद्देशाने जिल्ह्यातील काही शिक्षण संस्थामध्ये आपले सेवा केंद्र सुरू करण्याचे धोरण महसूल विभागाने घेतले असून, राज्यातील पहीला प्रयोग अहील्यानगर मधून सुरू झाला असल्याचे त्यांनी सांगितले.
संगमनेर विभागाचे प्रांताधिकारी शैलेंद्र हिंगे यांचा विशेष उल्लेख करून त्यांच्या पुढाकारने याच महाविद्यालयात ‘युवा ही दुवा’ ही संकल्पना राबवून शासनाच्या योजनेशी विद्यार्थ्यांना जोडून घेण्याचा प्रयत्न यशस्वी झाला. आता आपले सेवा केंद्र महाविद्यालयात सुरू झाल्याने दाखल्या करीता बाहेर जावे लागणार नाही. शासकीय दरानेच विद्यार्थ्यांना दाखले मिळू शकतील. दाखल्यांकरीता होणारी अर्थिक लूट थांबेल असा विश्वास ना. विखे पाटील यांनी व्यक्त केला.
राज्य सरकारने विद्यार्थ्यांकरीता मुख्यमंत्री युवा प्रशिक्षण कार्यक्रम हाती घेतला असून या माध्यमातून प्रशिक्षण आणि रोजगारच्या संधी निर्माण करून दिल्या जाणार आहेत. मुलींकरीता व्यावसायिक शिक्षण मोफत करण्याचा निर्णय घेण्यात आल्याचे त्यांनी सांगितले.
प्रवरा ग्रामीण शिक्षण संस्थेने कौशल्य प्रशिक्षणा करीता ३७ कोर्सेस सुरू केले असल्याचे सांगून, शिक्षण घेणारे आणि वंचित राहीलेला कोणताही युवकास प्रशिक्षण घेता येणार आहे. यासाठी संस्थेच्या वतीनेच प्रशिक्षण भत्‍ता देण्यात येत असल्याची माहीती त्यांनी दिली. देशात कौशल्य विकासाचा मोठा कार्यक्रम हाती घेण्यात आला असून शिक्षण संस्थाना आता यापासून दूर जाता येणार नाही.
संगमनेर महाविद्यालयाची परंपरा खूप मोठी असून शैक्षणिक गुणवत्‍ता राखण्यात महाविद्यायाने मिळवलेला नावलौकीक पाहाता प्रवरा ग्रामीण शिक्षण संस्थेच्या धर्तीवर शिक्षण प्रसारक संस्थेने कौशल्य विकास प्रशिक्षणाला प्राधान्य देण्याचे मंत्री विखे पाटील यांनी सुचित केले.
याप्रसंगी अनिल राठी यांनी आपले मनोगत व्यक्त केले. संस्थेच्या वतीने मंत्री विखे पाटील यांच्यासह महसूल अधिकाऱ्यांचा सत्कार करण्यात आला.