सुरक्षा दलांच्या कारवाईत ३१ नक्षलवादी ठार!
◻️ छत्तीसगडमधील बिजापूर येथे झाली चकमक
संगमनेर LIVE | छत्तीसगडमधील बिजापूर जिल्ह्यातील राष्ट्रीय उद्यान परिसरात सुरक्षा दल आणि नक्षलवाद्यांमध्ये झालेल्या चकमकीत ३१ नक्षलवादी ठार झाले आहेत. या कारवाईत दोन जवान शहीद झाले, तर दोन जवान गंभीर जखमी झाले आहेत.
सुरक्षा दलांना मिळालेल्या गुप्तचर माहितीच्या आधारे, नक्षलवाद्यांचे दोन दलम तोडका जंगल परिसरात लपून बसले असल्याची माहिती मिळाली होती. त्यानुसार, सुरक्षा दलांनी नक्षलविरोधी मोहीम राबविली. या मोहिमेदरम्यान, लपून बसलेल्या नक्षलवाद्यांनी जवानांवर गोळीबार केला, त्यानंतर जवानांनी त्यांना जोरदार प्रत्युत्तर दिले.
चकमकीत ३१ नक्षलवादी ठार झाले, तर दोन जवान शहीद झाले आणि दोन जवान गंभीर जखमी झाले आहेत. या कारवाईचे ठिकाण गडचिरोली जिल्ह्याच्या सीमेपासून जवळचे असून, ठार झालेल्या नक्षलवाद्यांचे मृतदेह जवानांनी ताब्यात घेतले आहेत.
तीन जिल्ह्यांतील सीआरपीएफ, डीआरजी आणि एसटीएफच्या जवानांनी संयुक्तपणे ही कारवाई केली. यामुळे नक्षलवादी गटाला मोठा धक्का बसल्याचे वृत्त विविध प्रसारमाध्यमांनी दिले आहे.