अल्पवयीन मुलीवर अत्याचार करणाऱ्या डॉक्टरला फाशी द्या - अमर कतारी

अल्पवयीन मुलीवर अत्याचार करणाऱ्या डॉक्टरला फाशी द्या - अमर कतारी

◻️ शिवसेनेकडून (उबाठा) डॉ. करपे यांच्या रुग्णालयावर मोर्चा

◻️ उपविभागीय पोलीस अधिकारी कुणाल सोनवणे यांना दिले निवेदन

संगमनेर LIVE | संगमनेर शहरातील डॉ. अमोल करपे यांनी त्यांच्या रुग्णालयात उपचार घेत असलेल्या एका १६ वर्षीय अल्पवयीन मुलीवर इमारतीच्या गच्चीवर नेवून अत्याचार केल्याची घृणास्पद घटना रविवार दिनांक ६ एप्रिल २०२५ रोजी पहाटे ४ ते ५ या वेळेत घडली. या नराधम डॉक्टरला पोलीसांनी नाशिक येथून ताब्यात घेतले असून याप्रकरणी अत्याचारित अल्पवयीन मुलीने दिलेल्या फिर्यादीवरून शहर पोलिसांनी गुन्हा दाखल केला आहे. 

त्यामुळे आक्रमक झालेल्या शिवसेनच्या (उध्दव बाळासाहेब ठाकरे) शिवसैनिकांनी डॉ. करपे यांच्या रुग्णालयावर मोर्चा काढला. यावेळी अल्पवयीन मुलीवर अत्याचार करणाऱ्या डॉक्टरला फाशी द्या. अशी मागणी माजी शहरप्रमुख अमर कतारी यांनी केली आहे.

याबाबत आज शिवसेनच्या (उध्दव बाळासाहेब ठाकरे) महिला आघाडीच्या वतीने उपविभागीय पोलीस अधिकारी कुणाल सोनवणे यांना निवेदन देण्यात आले. याप्रसंगी शिवसैनिक मोठ्या संख्येने उपस्थित होते.

दिलेल्या निवेदनात म्हटले आहे की, संगमनेर शहर व तालुक्यात आरोग्यक्षेत्रात सेवाभावी वृत्तीच्या डॉक्टर मंडळीच्या परंपरेला डॉ. अमोल करपे यांने काळीमा फासला आहे. एका अल्पवयीन मुलीवर लैंगिग अत्याचार घडल्याची घटना घडली असून त्याबाबत सदर मुलीकडून संगमनेर शहर पोलीस स्टेशन मध्ये अत्याचार व पोक्सो अंतर्गत गुन्हा देखील दाखल केला आहे. 

तसेच याबाबतचे वृत्त वृत्तपत्र वृत्तवाहिन्यांवरून देखील सदर घटना समोर आली आहे. त्यामुळे पीडितेला न्याय मिळावा यासाठी डॉ. करपे यांचे लायसन्स व रुग्णालय परवाना तातडीने रद्द करून जिल्हा शल्यचिकित्सक आणि माननीय न्यायाधीश यांचे मार्फत तात्काळ कार्यवाही करण्यात यावी. तसेच या प्रकरणाला जलद न्यायालयात वर्ग करुन तातडीने चौकशी व्हावी. या मागणीसाठीचे निवेदन देण्यात आले आहे.

दरम्यान २४ तासात आरोपी डॉक्टरसह रुग्णालयावर कारवाई न झाल्यास शिवसेना स्टाईलने धडा शिकवण्यात येईल असा इशारा देण्यात आला आहे.

यावेळी शिवसेना माजी शहर प्रमुख अमर भाऊ कातारी, युवा सेना जिल्हाप्रमुख अमित चव्हाण, राजू सातपुते, वेणुगोपाल लाहोटी, दीपक साळुंखे, भाऊसाहेब हासे, राष्ट्रवादीचे ज्ञानेश्वर गायकर, संकेत एखंडे, असिफ तांबोळी, फैसल सय्यद, विजू सातपुते, प्रकाश गायकवाड, अमोल डुकरे, राजू सातपुते यांच्यासह महिला पदाधिकारी मोठ्या संख्येने उपस्थित होते. दरम्यान या निवेदनाची प्रत मुख्यमंत्री देवेंद्र फडणवीस, जलसंपदा तथा पालकमंत्री राधाकृष्ण विखे यांना पाठवण्यात आल्याची माहिती देण्यात आली आहे.