संगमनेर Live | पंतप्रधान नरेंद्र मोदी यांनी सुरू केलेल्या प्रत्येक योजनामधून सामान्य माणसांचे हित जोपासले जात आहे. राष्ट्रीय वयोश्री योजनेच्या माध्यमातून केंद्र सरकारने जेष्ठ नागरीकांना आधार दिला असल्याचे प्रतिपादन आ. राधाकृष्ण विखे पाटील यांनी केले.
संगमनेर तालुक्यातील आश्वी येथे राष्ट्रीय वयोश्री योजेनच्या नोंदणी शिबीराचे आयोजन आ. राधाकृष्ण विखे पाटील यांच्या मार्गदर्शनाखाली आणि खा. डॉ सुजय विखे पाटील यांच्या नेतृत्वाखाली करण्यात आले. या शिबीरास आ. जयप्रकाश गोरे यांनी भेट देवून या शिबराच्या उपक्रमाचे कौतुक केले.
राष्ट्रीय वयोश्री योजनेच्या उत्तर नगर जिल्ह्यातील पाचव्या शिबीरात शिर्डी विधानसभा मतदारसंघात समाविष्ट असलेल्या संगमनेर तालुक्यातील गावांमधील जेष्ठ नागरीकांनी सहभाग घेवून उत्स्फूर्त प्रतिसाद दिला. आ. राधाकृष्ण विखे पाटील यांनी सकाळ पासूनच शिबीर स्थळी थांबून जेष्ठ नागरीकांना पंतप्रधान नरेंद्र मोदी यांच्या माध्यामातून मिळालेल्या योजनेचे महत्व सांगितले. विखे पाटील यांनी जेष्ठ नागरीकांचे कागदपत्र स्वतः तपासून घेत त्यांना मदत केली. येणाऱ्या जेष्ठ नागरीकांनी चहा नाष्टा घेतल्याची आस्थेपाईकपणे चौकशी विखे पाटील आपल्या पदाधिकाऱ्यांसह करीत होते.
याप्रसंगी बोलताना आ. विखे पाटील यांनी केंद्र सरकारची प्रत्येक योजना ही सामान्य माणसासाठी असल्याचे सांगून पंतप्रधान नरेंद्र मोदी जाहीर करीत असलेल्या प्रत्येक योजनेत सामान्य माणसांचे प्रतिबिंब पाहायला मिळते. सबका साथ सबका विश्वास आणि सबका प्रयास या मंत्राने केंद्र सरकारची प्रत्येक योजना भाजपचा कार्यकर्ता प्रत्येक कुटुंबांपर्यत पोहचवत आहे. राष्ट्रीय वयोश्री योजनेची सर्वाधिक नोंदणी नगर जिल्ह्यात झाली असल्याचे आ. विखे पाटील म्हणाले.
आ. जयकुमार गोरे यांनी शिबीरातील संपूर्ण व्यवस्थेची पाहाणी करून योजनेची प्रभावी अंमलबजावणी ग्रामीण भागात होत असल्याचे समाधान त्यांनी केले.
शिबीराचे औचित्य साधून नव्या रुग्णवाहीकेचे पूजन आ. जयकुमार गोरे यांच्या हस्ते करण्यात आले. याप्रसंगी प्रवरा बँकेचे चेअरमन अशोक म्हसे, संचालक दिनकर गायकवाड, रामभाऊ भुसाळ, कैलास तांबे, हभंप शातांराम जोरी, जिल्हा परिषद सदस्या सौ. रोहिणी निघुते, पंचायत सदस्या सौ. दिपाली डेंगळे, माजी उपसभापती मच्छींद्र थेटे, अँड. अनिल भोसले, भगवानराव इलग, सरपंच म्हाळू गायकवाड, सरपंच सतिष जोशी यांच्यासह पदाधिकारी व कार्यकर्ते उपस्थित होते.