मोधळवाडीच्या घाणेवस्ती येथे घडली घटना
संगमनेर Live | संगमनेर तालुक्याच्या पठारभागातील मोधळवाडी गावांतर्गत असलेल्या घाणेवस्ती येथे शेततळ्यात बुडून सख्या बहीण- भावाचा दुर्दैवी मृत्यू झाला आहे. ही घटना रविवारी (दि. ८ मे) सकाळी घडली आहे. या दुर्दैवी घटनेने मोधळवाडी गावासह पठारभागावर शोककळा पसरली असून जयश्री बबन शिंदे (वय - २१) व आयुष बबन शिंदे (वय - ७) असे बहीण- भावाचे नाव आहे.
याबाबत समजलेली माहिती अशी की, पिंपळगाव देपा गावांतर्गत असलेल्या मोधळवाडीतील घाणेवस्ती येथे बबन चांगदेव शिंदे हे आपल्या कुटुंबासमवेत राहात आहे. रविवारी सकाळी मुलगी जयश्री व मुलगा आयुष हे दोघे बहीण- भाऊ धुणे धुण्यासाठी आपल्याच शेतात असलेल्या शेततळ्यावर गेले होते.
आयुष हा शेततळ्यातून पाणी काढत असताना त्याच दरम्यान त्याचा पाय घसरला आणि तो शेततळ्यात पडला. त्यामुळे त्याला वाचवण्यासाठी बहीण जयश्री हिने शेततळ्यात उडी मारली मात्र दोघेही शेततळ्यातील पाण्यात बुडाले
जयश्री व आयुष हे दोघे बहीण - भाऊ शेततळ्यात बुडाल्याची माहिती समजताच आजूबाजूच्या नागरिकांनी घटनास्थळी धाव घेतली. त्यानंतर दोघांनाही शेततळ्यातून बाहेर काढण्यात आले पण, त्या अगोदरच बहीण- भावाचा दुर्दैवी मृत्यू झाला होता. दोघांचेही मृत्यूदेह शवविच्छेदनासाठी संगमनेर कुटीर रूग्णालयात नेण्यात आले आहे.
दरम्यान याप्रकरणी धीरज शिंदे याने दिलेल्या खबरीवरून घारगाव पोलीसांनी अकस्मात मृत्यूची नोंद केली असून पुढील तपास पोलीस निरीक्षक सुनील पाटील यांच्या मार्गदर्शनाखाली पोलीस हेडकॉन्स्टेबल रामभाऊ भुतांबरे हे करीत आहे. तर बहीण- भावाच्या दुर्दैवी मृत्यूने पिंपळगाव देपा गावासह पठारभागावर शोककळा पसरली आहे.
बहीण- भावाच्या मृत्यूने ग्रामस्थांनी केली हळहळ व्यक्त..
जयश्री व आयुष या दोघा बहीण- भावाचा स्वभाव अत्यंत मनमिळाऊ होता. त्यामुळे त्यांच्या दृर्दैवी मृत्यूने मोधळवाडी, पिंपळगाव देपा ग्रामस्थांनी हळहळ व्यक्त केली असून अनेकांना अश्रु अनावर झाले होते.