◻ राजहंस दूध संघात मूर्ती प्राणप्रतिष्ठा व कलशरोहन संपन्न
संगमनेर Live | गोरगरीब माणसांच्या जीवनात आनंद निर्माण करण्यासाठी संगमनेर तालुक्याच्या सर्व सहकारी संस्थांच्या माध्यमातून सातत्याने काम होत आहे. या चांगल्या कामाला ईश्वराचे कायम आशीर्वाद असल्याचे प्रतिपादन काँग्रेसचे वरिष्ठ नेते व माजी महसूल मंत्री आमदार बाळासाहेब थोरात यांनी केले आहे. राजहंस दूध संघ येथे म्हसोबा महाराज व माऊली मूर्ती प्राणप्रतिष्ठा व मंदिराच्या लोकार्पण सोहळ्यात ते बोलत होते.
संगमनेर तालुका सहकारी दूध संघाच्या प्रांगणात नवीन मंदिराचा लोकार्पण व कलश रोहन काँग्रेस नेते आमदार बाळासाहेब थोरात, आमदार डॉ. सुधीर तांबे, वरवंडी चे दत्तगिरी महाराज, महानंदाचे व दूध संघाचे अध्यक्ष रणजितसिंह देशमुख व सौ. शरयूताई देशमुख संपन्न झाला. याप्रसंगी ज्येष्ठ नेते बाजीराव खेमनर, इंद्रजीत थोरात, कारखान्याचे अध्यक्ष बाबा ओहोळ, रामहरी कातोरे, दूध संघाचे उपाध्यक्ष राजेंद्र चकोर, संचालक लक्ष्मणराव कुटे, आर .बी. राहणे, विलास वर्पे, भास्कर सिनारे, संतोष मांडेकर, विलासराव कवडे, बबनराव कुराडे, बादशाह वाळूंज, संजय पोकळे, विक्रम थोरात ,विष्णू ढोले, तुकाराम दातीर ,रवींद्र रोहम, सौ. प्रतिभा सोमनाथ जोंधळे, सौ. मंदाताई गोरख नवले, कार्यकारी संचालक डॉ. सुजित खिलारी, अजय फटांगरे, सुभाष सांगळे, पांडुरंग सागर आदी उपस्थित होते.
याप्रसंगी बोलताना आमदार थोरात म्हणाले की, संगमनेर तालुका हा सहकारातून समृद्धीकडे वाटचाल करत आहे. तालुक्यातील सर्व शिखर संस्था या गोरगरीब माणसाच्या जीवनात आनंद निर्माण करण्याचे काम करत आहे. या सर्व चांगल्या कामाला परमेश्वराचा सदैव आशीर्वाद लाभला आहे. संगमनेर तालुका दूध संघ हा गायीच्या दुधामध्ये राज्यात एक नंबरचा दूध संघ आहे. तालुक्यात सध्या सुमारे सात लाख लिटर दूध उत्पादन होत असून तालुक्याची ओळख आता दुधाचा तालुका म्हणून झाली आहे. गुणवत्ता हे या संघाचे वैशिष्ट्य राहिले आहे. महाराष्ट्र बाहेरही राजहंस दूध संघाला मोठी मागणी असून या प्रांगणात होत असलेल्या या सुंदर मंदिरामुळे या परिसराच्या वैभवात भर पडणार असल्याचे ते म्हणाले.
आमदार डॉ. तांबे म्हणाले की, संगमनेरच्या सहकार हा देशाला मार्गदर्शक ठरत आहे. महाराष्ट्रातील ग्रामीण जीवनामध्ये सहकाराने मोठे परिवर्तन केले आहे. या चळवळीतील संगमनेरच्या सहकार हा मॉडेल सहकार ठरला आहे.
दूध संघाचे अध्यक्ष रणजीतसिंह देशमुख म्हणाले की, काँग्रेस नेते आमदार बाळासाहेब थोरात यांच्या मार्गदर्शनाखाली राजहंस दूध संघाने अडचणीच्या काळात शेतकऱ्यांना मोठी मदत केली. हा संघ शेतकऱ्यांचा संघ आहे. या दूध संघामुळे ग्रामीण अर्थव्यवस्था मजबूत झाली असून शेतकऱ्यांच्या जीवनामध्ये आनंद निर्माण झाला आहे. श्रद्धा सबुरी बरोबर गुणवत्ता हे वैशिष्ट्य या परिसराने जपली असून नवीन मंदिरामुळे हा परिसर अधिक सुशोभित झाला असल्याचे ते म्हणाले.
यावेळी दत्तगिरी महाराज, इंद्रजीत थोरात, बाजीराव खेमनर, बाबा ओहोळ, डॉ. जयश्रीताई थोरात यांनीही मनोगत व्यक्त केले.
दरम्यान या कार्यक्रमाचे प्रास्ताविक कार्यकारी संचालक डॉ. सुजित खिलारी यांनी केले. सूत्रसंचालन ॲड. सुरेश जोंधळे यांनी केले तर उपाध्यक्ष राजेंद्र चकोर यांनी आभार मानले.
