◻ संगमनेर भाजपच्‍या शिष्‍टमंडळाला महसूल मंत्री विखे पाटील याचे आश्‍वासन
◻ शहर आणि ग्रामीण भागाच्‍या दृष्‍टीने कॉटेज रुग्‍णालय सुरु होणे गरजेचे
संगमनेर Live | संगमनेर नगरपरिषदेच्‍या कॉटेज रुग्‍णालयामध्‍ये १०० बेडचे महिला रुग्‍णालय मंजुर करण्‍याच्‍या दृष्‍टीने आपण निश्चित प्रयत्‍न करु असे आश्‍वासन मंत्री ना. राधाकृष्‍ण विखे पाटील यांनी भाजपच्‍या शिष्‍टमंडळाला दिले.
संगमनेर नगरपरिषदेच्‍या कॉटेज रुग्‍णालयात १०० बेडचे रुग्‍णालय सुरु होण्‍याच्‍या दृष्‍टीने मागील युती सरकार सत्‍तेवर असतानाच प्रयत्‍न सुरु झाले होते. तत्‍कालिन आरोग्‍य मंत्री आणि आत्‍ताचे मुख्‍यमंत्री ना. एकनाथ शिंदे यांनीच याबाबतीत सकारात्‍मक विचार करुन, सर्वसमावेशक अहवाल सादर करण्‍यास सांगितले होते. मात्र त्‍यानंतर राज्‍यात आघाडी सरकार आल्‍यानंतर हा विषय मागे पडला. परंतू आता नव्‍याने आलेल्‍या सरकारमध्‍ये या विषयाचा गांभिर्याने पाठपुरावा करुन, कॉटेज रुग्‍णालय पुन्‍हा सर्व सुविधांनी कार्यान्वित करण्‍यासाठी आपला निश्चित प्रयत्‍न राहील असे ना. विखे पाटील यांनी भाजपाच्‍या शिष्‍टमंडळास सांगितले.
संगमनेर नगर परिषदेच्‍या आधिपत्‍याखाली कॉटेज हॉस्‍पीटलची स्‍थापना करण्‍यात आली. त्‍यानंतर २००३ मध्‍ये ग्रामीण रुग्‍णालयाची सुरुवात झाली. सदर रुग्‍णालय हे शहरापासुन १० कि. मी. अंतरावर असल्‍याने कॉटेज रुग्‍णालयातील सर्व वैद्यकीय आधिकारी शासनाने कार्यमुक्‍त केले. यामुळे नागरीकांना सुविधाही बंद झाल्‍या. या सुविधा महिलांसाठी पुन्‍हा सुरु व्‍हाव्‍यात अशी मागणी मंत्री विखे पाटील यांच्‍याकडे माजी नगरसेविका सौ. मेधा भगत यांनी यापूर्वीच करुन पाठपुरावा सुरु ठेवला होता. याची आठवणही चर्चेदरम्‍यान ना. विखे पाटील यांनी काढली.
शहर आणि ग्रामीण भागाच्‍या दृष्‍टीने कॉटेज रुग्‍णालय सुरु होणे अत्‍यंत गरजेचे असून, सर्वसामान्‍य माणसाला त्‍याचा दिलासा मिळू शकेल. १०० बेडचे महिलांचेच रुग्‍णालय सुरु करुन, महिलांनाही आरोग्‍य सुविधेकरीता याची मदत होईल असा विश्‍वास ना. विखे पाटील यांनी यावेळी बोलताना व्‍यक्‍त केला. याप्रसंगी भाजप ओबीसी आघाडीचे दिपक भगत, भारत गवळी यांच्‍यासह पदाधिकारी, कार्यकर्ते उपस्थित होते.
