◻️ जिल्हाधिकारी डॉ. राजेन्द्र भोसले यांच्या सुचना
◻️पदवीधर मतदार नाव नोंदणी ही ऑनलाईन आणि ऑफलाईन पद्धतीने
◻️खाजगी संस्था, व्यक्ती अथवा राजकीय पक्ष वा कार्यकर्ते यांच्याकडून गुगल अथवा इतर लिंकद्वारे भरलेले अर्ज अधिकृत नाही
संगमनेर Live (अहमदनगर) | भारत निवडणूक आयोगाच्या निर्देशानुसार दिनांक १ नोव्हेंबर, २०२२ या अर्हता दिनांकावर आधारित नाशिक विभाग पदवीधर मतदार संघाच्या मतदार याद्या नव्याने तयार करणेबाबतच्या कार्यक्रमाची अंमलबजावणी भारत निवडणूक आयोग आणि मुख्य निवडणूक अधिकारी, महाराष्ट्र राज्य, मुंबई यांच्या निर्देशाप्रमाणे अहमदनगर जिल्ह्यात होत आहे.
विभागीय आयुक्त, नाशिक विभाग, नाशिक हे या पदवीधर मतदार नोंदणी कार्यक्रमाचे मतदार नोंदणी अधिकारी असून जिल्हाधिकारी, अहमदनगर हे सहाय्यक मतदार नोंदणी अधिकारी म्हणून काम करीत आहेत. पदवीधर मतदार नाव नोंदणी ही ऑनलाईन आणि ऑफलाईन पद्धतीने नमुना - १८ भरून संबधित पदनिर्देशित अधिकारी, तहसिलदार यांच्या कार्यालयात जमा केले जात आहेत.
पात्र पदवीधर मतदार हे नमुना - १८ भरून प्रत्यक्षरीत्या मंडळस्तरावर अथवा तहसील कार्यालयात (निवडणूक शाखा) येथे देवू शकतात अथवा मुख्य निवडणूक अधिकारी, महाराष्ट्र राज्य, मुंबई यांच्या अधिकृत लिंकद्वारे (https://ceoelection.maharashtra.gov.in/graduate) भरू शकतात.
अहमदनगर जिल्ह्यातील सर्व पात्र पदवीधर मतदारांनी शासनाच्या उपरोक्त अधिकृत लिंकद्वारे ऑनलाईन पद्धतीने नमुना - १८ भरावयाचा आहे. तथापि खाजगी संस्था, व्यक्ती अथवा राजकीय पक्ष वा कार्यकर्ते यांच्याकडून गुगल अथवा इतर लिंकद्वारे मतदारांनी आपला नमुना - १८ भरल्यास असा अर्ज हा अधिकृत नाही. त्यामुळे उपरोक्त शासकीय लिंक वगळता इतर लिंकद्वारे भरलेला ऑनलाईन अर्ज ग्राहय धरला जाणार नाही. अशा नमुना - १८ ची तहसील स्तरावर डाटा एन्ट्री केली जात नाही.
सर्व पदवीधर मतदारांनी निवडणूक आयोगाच्या अधिकृत लिंकद्वारेच नमुना - १८ भरावा असे आवाहन जिल्हाधिकारी तथा सहाय्यक मतदार नोंदणी अधिकारी, नाशिक विभाग पदवीधर मतदार संघ जिल्हा अहमदनगर डॉ. राजेन्द्र भोसले, यांनी प्रसिद्धी पत्रकाद्वारे केले आहे.