◻️ मालुंजे, हंगेवाडी, सादतपूर, रहिमपूर येथे बिनविरोध तर निमगावजाळी येथे झाली निवडणूक
◻️ कोण झाले कोणत्या ग्रामपंचायतीत उप सरपंच वाचा सविस्तर..
संगमनेर Live | संगमनेर तालुक्यातील मुदत संपलेल्या ३७ ग्रामपंचायतीच्या सार्वत्रिक निवडणुका नुकत्याच पार पडल्या. सरपंच पदाची निवडणूक थेट जनतेतून झाली असल्याने आता उपसरपंच पदाच्या निवडणुकीला मोठे महत्व प्राप्त झाले होते. गुरूवारी (दि. २९) होणाऱ्या या उप सरपंच निवडींकडे सर्वांचे लक्ष लागले होते. यामध्ये आश्वी व जोर्वे गटातील उप सरपंचाची निवडणूक प्रक्रिया शांततेत पार पडल्याची माहिती मिळाली आहे.
या निवडणुकीत आश्वी व जोर्वे जिल्हा परिषद गटात ना. विखे पाटील याना मानणाऱ्या गटाने सहा तर माजी मंत्री आ. बाळासाहेब थोरात यांना मानणाऱ्या गटाने चार ग्रामपंचायतीच्या सरपंच पदावर विजय मिळविला होता. असे असले तरी अनेक ठिकाणी अतर्गत धुसफुस यामुळे उपसरपंच पदाच्या निवडणूकीला प्रतिष्ठाला प्राप्त झाली होती. यामुळे निवडणुका पार पडलेल्या गावात उप सरपंच पदावर कोण विराजमान होणार.? या बाबत संबधित गावासह तालुक्याचेही लक्ष लागून राहिले होते.
गुरुवारी सकाळी पार पडलेल्या निवडणूक प्रक्रियेनतंर सादतपूर ग्रामपंचायतीच्या उप सरपंचपदी दिलिप संपत मगर, रहिमपूर ग्रामपंचायतीच्या उप सरपंचपदी राहुल अशोक गुळवे, मालुंजे ग्रामपंचायतीच्या उप सरपंचपदी दत्तु खरात तर हंगेवाडी ग्रामपंचायतीच्या उप सरपंचपदी संतोष लहानु कांगणे याची बिनविरोध निवड झाली आहे. तर निमगावजाळी याठिकाणी उप सरपंच पदासाठी दोन अर्ज दाखल झाल्यामुळे निवडणूक होऊन उप सरपंच पदाची माळ ज्ञानेश्वर बाळासाहेब डेगंळे यांच्या गळ्यात पडली आहे.
दरम्यान उप सरपंच पदाच्या या निवडी जनतेतून विजयी होऊून सरपंच पदावर विराजमान झालेल्या नूतन सरपंचाच्या अध्यक्षतेखाली पार पडल्या असून संबंधित ग्रामपंचायतीचे ग्रामसेवक यानी सहाय्यक म्हणून काम पाहिले. तसेच या निवडणुकीसाठी तहसील कार्यालयाच्या निवडणूक विभागाकडून निरीक्षकांच्या नियुक्त्या करण्यात आल्या होत्या. एकदंरीत ग्रामपंचायत निवडणुका पार पडलेल्या आश्वी व जोर्वे गटातील ग्रामपंचायतीच्या उप सरपंच पदी तरुणाना संधी दिल्याचे चित्र आहे. तर आज सर्व ठिकाणी निवडणूक प्रक्रिया शांततेत पार पडल्याची माहिती मिळाली आहे.
