अवघ्या नऊ वर्षाचा चिमुकला बिबट्याच्या प्राणघातक हल्ल्यात ठार!
◻️ लोणी येथील दुर्दैवी घटनेमुळे पंचक्रोशीत शोककळा
संगमनेर LIVE | राहाता तालुक्यातील लोणी येथे बिबट्याने प्राणघातक हल्ला करत अवघे नऊ वर्ष वय असलेला चिमुकला प्रवीण लहामगे याला ठार केल्याची धक्कादायक घटना सोमवारी सकाळी उघडकीस आल्याने एकचं खळबळ उडाली आहे.
याबाबत मिळालेली अधिक माहिती अशी की, लोणी बुद्रुक येथील प्रवरा ग्रामीण रुग्णालय समोर गोसावी वस्तीवर लहामगे कुटुंब राहते. या कुटुंबातील प्रवीण लहामगे यांचा मुलगा सायंकाळी संदीप गोसावी यांच्या घरी खेळण्यासाठी गेला होता. त्यानंतर संदीप गोसावी यांचा मुलगा गणेश गोसावी हे दोघे सोबत दूध आणण्यासाठी गेले. दूध घेऊन आल्यानंतर संदीप गोसावी यांचा मुलगा गणेश हा घरामध्ये दूध देण्यासाठी गेला. त्यानंतर त्याने बाहेर येऊन बघितले असता अथर्व त्याला तेथे दिसून आला नाही. त्याला वाटले की अथर्व हा घरी गेला.
त्यानंतर अथर्व लहामगे यांच्या घरच्यांनी संदीप गोसावी यांच्याशी संपर्क केला असता त्यांनी सांगितले की अथर्व घरी आला नाही. गोसावी कुटुंबाने सांगितले की अथर्व घरी जाऊन खूप वेळ झाला आहे. त्यानंतर लहामगे कुटुंबीयांनी अथर्वचा शोध घेतला असता अथर्व हा रात्री अकरा ते साडेअकराच्या सुमारास संदीप नवनाथ गोसावी यांच्या मालकीच्या मकाच्या शेताच्या मध्यभागी गंभीर जखमी अवस्थेत सापडला.
जखमी अथर्वला प्रवरा ग्रामीण रुग्णालयात उपचारासाठी नेले असता डॉक्टरांनी त्याला मृत घोषित केले. लोणी मध्ये प्रथमच अशी घटना घडली आहे. या घटनेमुळे लोणी परिसरामध्ये खळबळ उडाली आहे. लहामगे कुटुंब ज्या परिसरामध्ये राहतात त्या परिसरातील नागरिकांनी वन विभागाला पिंजरा लावण्याची वारंवार मागणी केली होती.
दरम्यान या घटनेची माहिती वन विभागाला मिळताच कोपरगाव वनविभाग परिक्षेत्राचेवन अधिकारी सागर केदार यांनी घटना ठिकाणी धाव घेऊन घटनेची पाहणी करून घटनेचा पंचनामा केला असल्याची माहिती मिळाली आहे.
