उद्याच्या मंत्रिमंडळ बैठकीत दूध दराबाबत निर्णय घ्या, अन्यथा पुन्हा आंदोलन - किसान सभा
◻️ महानंदा NDDB ला चालवायला देण्याच्या निर्णय गुजरातला पायघड्या घालण्यासाठीच
◻️ महाराष्ट्रभर आंदोलन उभे करणार असल्याची माहिती डॉ. अजित नवले यांची माहिती
संगमनेर LIVE | दूध उत्पादकांना दूध दराबद्दल दिलासा देण्यासाठी प्रति लिटर पाच रुपयाचे अनुदान दिले जाईल अशा प्रकारची घोषणा दुग्धविकास मंत्री राधाकृष्ण विखे पाटील यांनी सभागृहामध्ये केलेली होती. मात्र निर्णय घेण्यात आलेला नाही. त्यामुळे उद्याच्या मंत्रिमंडळ बैठकीत दूध दराबाबत निर्णय घ्या, अन्यथा पुन्हा आंदोलन करु असा इशारा किसान सभेचे डॉ. अजित नवले यांनी दिले आहे.
१ जानेवारीपासून दूध संकलनाचे नवीन मस्टर सुरू होते. या मस्टरमध्ये तरी दूध उत्पादकांना अशाप्रकारे अनुदान मिळेल अशी अपेक्षा दूध उत्पादक शेतकरी बाळगून होते. मात्र १ जानेवारी उलटून गेली आणि नवीन मस्टर सुरू झाले तरीसुद्धा अद्याप अशा प्रकारचं अनुदान शेतकऱ्यांना देण्याबद्दल हालचाल झालेली नाही.
अनुदानाची फाईल अर्थ विभागाकडेच पडून असून याबाबत अर्थ विभागाचा व मंत्रिमंडळाचा निर्णय झाल्याशिवाय शासनआदेश सुद्धा काढला जाणार नाही, अशा प्रकारची माहिती समोर आली आहे. ही अत्यंत गंभीर बाब आहे. शेतकरी अडचणीत असताना अनुदान द्यायचे नाही व मार्च दरम्यान लीन सीजन सुरू झाल्यानंतर जेव्हा आपोआप दुधाचे दर वाढतात तेव्हा अनुदान देण्याबाबत भूमिका घ्यायची हा सरकारचा वेळकाढूपणा शेतकरी विरोधी आणि दुध व्यवसायाला अत्यंत मारक आहे.
सरकारने अधिक अंत न पाहता उद्या किंवा परवा होत असलेल्या मंत्रिमंडळाच्या बैठकीमध्ये याबाबत अंतिम निर्णय करावा. सहकारी दूध संघांबरोबरच खाजगी दूध संघांना दूध पुरवणाऱ्या शेतकऱ्यांना सुद्धा प्रतिलिटर पाच रुपयाचे अनुदान देण्याबाबतचा निर्णय घ्यावा व शेतकऱ्यांना सरकारने जाहीर केल्याप्रमाणे प्रति लिटर ३४ रुपयाचा दर देणे खाजगी व सहकारी दूध संघांना बंधनकारक करावं तसच पशुखाद्याचे दर कमी करण्यासाठी ठोस पावले उचलावीत, अशा प्रकारची मागणी किसान सभा पुन्हा एकदा करत आहे. सरकारने याबाबत उद्याच्या बैठकीमध्ये ठोस निर्णय न घेतल्यास पुन्हा एकदा महाराष्ट्रभर आंदोलन उभे करणार असल्याची माहिती किसान सभेचे डॉ. अजित नवले यांनी दिली.
