भारतीय स्वातंत्र्य लढ्यात क्रांती दिनाचे मोठे महत्त्व - बाळासाहेब थोरात
◻️ संगमनेर येथे काँग्रेसच्या वतीने ९ ऑगस्ट क्रांती दिन साजरा
संगमनेर LIVE | १८५७ पासून सुरू झालेल्या भारतीय स्वातंत्र्य लढ्यात अनेक थोर पुरुषांनी व क्रांतीकारांनी बलिदान दिले. ९ ऑगस्ट १९४२ रोजी राष्ट्रपिता महात्मा गांधी यांनी ‘चले जाव’ ची घोषणा देऊन स्वातंत्र्याचे आंदोलन व्यापक केले. सर्व देशवासीयांना प्रेरणादायी असणाऱ्या ९ ऑगस्ट क्रांती दिनाचे भारतीय स्वातंत्र्य लढ्यात मोठे महत्त्व असल्याचे गौरवोद्गार काँग्रेस पक्षाचे नेते आमदार बाळासाहेब थोरात यांनी काढले आहे.
संगमनेर नगरपालिका संगमनेर तालुका व शहर काँग्रेस कमिटी यांच्या वतीने संगमनेर शहरात ९ ऑगस्ट क्रांती दिनानिमित्त नेहरू चौक येथे अशोक स्तंभ अभिवादन करण्यात आले. यावेळी ते बोलत होते. माजी आमदार डॉ. सुधीर तांबे, नगराध्यक्ष सौ. दुर्गाताई तांबे, युवक काँग्रेसचे अध्यक्ष डॉ. जयश्री थोरात, नगरपालिकेचे मुख्याधिकारी राहुल वाघ यांच्यासह काँग्रेसच्या सर्व सेलचे प्रमुख पदाधिकारी व कार्यकर्ते मोठ्या संख्येने उपस्थित होते.
यावेळी डॉ. जयश्री थोरात यांच्या नेतृत्वाखाली बाजारपेठ - मेन रोड ते छत्रपती शिवाजी महाराज पुतळा अशी प्रभात फेरी काढण्यात आली.
बाळासाहेब थोरात पुढे म्हणाले की, क्रांती दिन ९ ऑगस्ट, हा भारतीय स्वातंत्र्य चळवळीतील एक महत्त्वपूर्ण दिवस आहे. १९४२ साली महात्मा गांधी यांनी भारत छोडो आंदोलन सुरू केले, या दिवशी भारतीय जनतेने इंग्रजांच्या अन्यायाविरुद्ध बंड पुकारले आणि स्वातंत्र्याच्या दिशेने निर्णायक पाऊल टाकले.
क्रांती दिनाच्या निमित्ताने या दिवसाचे महत्त्व, त्याची पार्श्वभूमी, घटना आणि परिणाम याबद्दल विचार करणे आवश्यक आहे. क्रांतिदिन हा दिवस आपल्या स्वातंत्र्यसैनिकांच्या शौर्याची आणि बलिदानाची आठवण करून देतो. क्रांती दिनाच्या निमित्ताने प्रत्येकाने आपल्या देशाच्या प्रगतीसाठी, सामाजिक न्यायासाठी आणि मानवतेच्या कल्याणासाठी एकत्रितपणे कार्य करण्याचा संकल्प करावा असे आवाहन केले
डॉ. तांबे म्हणाले, भारतीय स्वातंत्र्य लढ्यात अनेक राष्ट्रपुरुष कार्यकर्ते आदिवासी नेते स्वातंत्र्यसैनिक यांचे मोठे योगदान राहिले आहे. घटनेने लोकशाही लोकांना दिलेली ताकद आहे. या घटनेचे रक्षण करण्यासाठी प्रत्येकाने कटिबद्ध राहिले पाहिजे.
दरम्यान याप्रसंगी सर्व मान्यवरांनी अशोक स्तंभाला अभिवादन केले.