अवकाळी पावसाने नुकसान झालेल्या शेतकऱ्यांना तातडीने मदत द्या - डॉ. जयश्री थोरात

अवकाळी पावसाने नुकसान झालेल्या शेतकऱ्यांना तातडीने मदत द्या - डॉ. जयश्री थोरात

◻️ कौठे धांदरफळ येथील गाई दगावलेल्या घुले कुटुंबीयांचे डॉ. थोरात यांच्याकडून सांत्वन

संगमनेर LIVE | संगमनेर तालुक्यात काल अवकाळी पावसाने शेतकऱ्यांचे मोठे नुकसान झाले आहे. याचबरोबर कौठे धांदरफळ येथील निवृत्ती रखमा घुले यांच्या दोन गायी वीज पडून मृत पावल्याने या कुटुंबीयांचे मोठे नुकसान झाले आहे. त्यामुळे सर्व नुकसानग्रस्तांचे तातडीने पंचनामे करून त्वरित मदत द्यावी. अशी मागणी डॉ. जयश्री थोरात यांनी केली. त्याचबरोबर परिसरामध्ये झालेल्या नुकसानीची पाहणी त्यांनी केली.

कौठे धांदरफळ येथील निवृत्ती रखमा घुले यांच्या दोन गायी काल वीज पडून मृत्यू पावल्या होत्या. आज तातडीने डॉ. जयश्री थोरात यांनी घुले कुटुंबीयांची भेट घेतली. यावेळी समवेत पांडुरंग घुले, प्राजक्ता घुले आदिसह शासकीय अधिकारी व गावातील पदाधिकारी मोठ्या संख्येने उपस्थित होते.

यावेळी डॉ. जयाश्री थोरात म्हणाल्या की, प्रत्येक शेतकरी हा अत्यंत मोठ्या कष्टातून आपले पिक उभे करतो. संघर्ष शेतकऱ्यांच्या जीवनात कायम असतो. संगमनेर तालुक्यामध्ये पशुधन मोठ्या प्रमाणात आहे. दुधाचा तालुका ही आपली ओळख निर्माण झाली आहे. प्रत्येक घरापुढे किमान एक दोन गायी असतात. काल झालेल्या अवकाळी पावसाने अनेक शेतकऱ्यांचे नुकसान झाले असून घुले कुटुंबीयांच्या दोन गायी वीज पडून मृत पावलेले आहेत.

दुधामुळे या कुटुंबाला आर्थिक उत्पन्न मिळत होते. मात्र गायी मृत पावल्याने या कुटुंबीयांचे मोठे नुकसान झाले आहे. शासनाने आता फक्त घोषणाबाजी न करता नुकसान झालेल्या शेतकऱ्यांना तातडीने मदत दिली पाहिजे. संकटाच्या काळात शेतकऱ्यांच्या नेहमी पाठीशी उभे राहिले पाहिजे.

लोकनेते बाळासाहेब थोरात यांच्या मार्गदर्शनाखाली संगमनेर तालुका हा आपला एक परिवार आहे. तालुक्यातील प्रत्येक कुटुंबाच्या सुख दुःखात सर्वजण सहभागी होतात. एकमेकाला मदत करतात. ही आपली परंपरा आहे. आज घुले कुटुंबीयांवर मोठे आर्थिक संकट कोसळले आहे.

या कुटुंबाला तातडीने मदत गरजेची आहे. म्हणून प्रशासनाने कोणताही हलगर्जीपणा न करता कोणताही देखावा न करता त्वरित मदत देण्यासाठी कार्यवाही करावी अशी मागणी जयश्री थोरात यांनी यावेळी केली.

पांडुरंग पाटील घुले यांनी देखील मनोगत व्यक्त केले. यावेळी सौ. सुनंदा घुले, निवृत्ती घुले आदींसह परिवारातील सर्वाशी संवाद साधून डॉ. जयश्री थोरात यांनी त्यांचे सांत्वन केले.