कत्तलखान्यांबाबत खोटी माहिती देणाऱ्या पोलीस अधिकाऱ्यांना निलंबित करा
◻️ आमदार अमोल खताळ यांची विधान सभेत गृहमंत्र्यांकडे मागणी
◻️ अवैध धंदे आणि व्यसनाच्या माध्यमातून तरुण पिढी नासवण्याचे काम सुरू
संगमनेर LIVE | संगमनेर शहरातील अवैध रित्या सुरू असणाऱ्या कत्तलखान्याबाबत संगमनेरचे उपविभागीय पोलीस अधिकारी आणि संगमनेर शहर पोलीस निरीक्षक यांच्या कडून शासनाला देण्यात आलेली सर्व माहिती खोटी आणि दिशाभूल करणारी असल्याचे आमदार अमोल खताळ यांनी विधिमंडळात लक्षवेधी द्वारे शासनाच्या निदर्शनास आणून दिले. तर, या अधिकाऱ्यांना त्वरित निलंबित करावे अशी मागणी देखील गृहमंत्र्यांकडे केली.
संगमनेर शहरात राजेरोसपणे कत्तल खाने चालवली जात आहे. शहर पोलीस त्यांच्या विरोधात थातुरमातुर कारवाई करत आहे. गोवंश हत्याबंदी कायद्यातील तरतूदीतून पळवाट काढून कत्तल खाना चालक - मालक यांना वाचवण्याचे प्रयत्न केले जात आहेत. आत्तापर्यंत संगमनेर पोलिसांनी गोवंश हत्या आणि कत्तलखाने प्रकरणात एकाही कत्तल खाना चालक मालकावर एमपीडीए नुसार कारवाई केलेली नाही.
तरी, देखील तशी कारवाई केली असल्याचे संगमनेरचे उपविभागीय पोलीस अधिकारी आणि संगमनेर शहर पोलीस निरीक्षक यांनी गृहमंत्री तथा मुख्यमंत्री यांना सांगत खोटी माहिती देऊन शासनाची दिशाभूल केली आहे. त्यामुळे गृहमंत्र्यांनी संगमनेरचे उप विभागीय पोलीस अधिकारी आणि शहर पोलीस निरीक्षक यांच्यावर निलंबनाची कारवाई करावी. तसेच त्या माहितीची खातरजमा न करणारे अहिल्यानगरचे जिल्हा पोलीस अधीक्षक यांना देखील सक्त ताकीद देण्यात यावी. अशीही जोरदार मागणी आमदार अमोल खताळ यांनी विधानसभेत केली.
संगमनेर शहरातील महाविद्यालये, रुग्णालये व धार्मिकस्थळे, झोपडपट्टी परिसर इत्यादी ठिकाणी अवैध गुटखा, मादक पदार्थ, नशेची गोळी, सिगारेट तसेच अफू, गांजा जवळपासच्या पान टपरीवर खुलेआम विक्री केली जात आहे. मटका, ऑनलाईन जुगाराकडे बेरोजगार तरुणांच्या रांगा दिसून येत आहेत.
तसेच मोठ्या प्रमाणावर अवैध गावठी दारू निर्मिती, वाहतुक करून त्याची राजरोसपणे विक्री केली जात आहे. या माध्यमातून संगमनेरची तरुण पिढी नासवण्याचे काम होत आहे. याकडे पोलिसांचे दुर्लक्ष होत आहे. या सर्व प्रश्नांकडे आमदार खताळ यांनी सभागृहाचे लक्ष वेधत या प्रकरणी दोषी असणाऱ्यांवर कारवाई करण्याची मागणी केली.