पाच वर्षाचे ‘व्हिजन’ घेऊन नगराध्यक्ष पदाच्या उमेदवार सुवर्णा खताळ मैदानात!
◻️ शहरातील युवासह महिलांचा सुवर्णा खताळ यांच्याभोवती गराडा
संगमनेर LIVE | संगमनेर नगरपरिषदेच्या निवडणुकीत शिवसेना (शिंदे गट) नगराध्यक्षपदाच्या उमेदवार सुवर्णा खताळ यांच्यासह सर्व उमेदवारांना मिळत असलेला जोरदार प्रतिसाद मिळत आहे. शहरातील प्रत्येक प्रभागात सुवर्णा खताळ यांच्या प्रचाराला मिळत असलेला वाढता प्रतिसाद पाहता, संगमनेरच्या राजकीय वर्तुळात 'खताळ लाट' उसळल्याची जोरदार चर्चा सुरू झाली आहे.
तळागाळात आमदार अमोल खताळ यांचा वेगवान प्रचार
प्रचारासाठी अवघे काहीच दिवस शिल्लक असताना, आमदार अमोल खताळ यांनी स्वतः तळागाळात उतरून प्रचाराची धुरा सांभाळली आहे. प्रभागनिहाय नागरिकांशी संवाद, पायी भेटी आणि घर-दार मोहीम या माध्यमातून ते पक्षाच्या उमेदवारांचा प्रचार अधिक वेगाने करत आहेत. यास नागरिकांकडून उत्स्फूर्त प्रतिसाद मिळत आहे. अनेक मतदार थेट आमदार खताळ यांच्याशी भेटून, “भाऊ, विजय नक्की तुमचाच! यंदा संगमनेर विकासाच्या मार्गावर जाणार, अशी खात्री आहे," अशा शब्दांत आपला विश्वास व्यक्त करत आहेत.
उच्चशिक्षित सुवर्णा खताळ यांच्या व्हिजनला आत्मीयता
उच्चशिक्षित आणि सर्वसामान्य कुटुंबातून पुढे आलेल्या सुवर्णा खताळ यांच्याबद्दल नागरिकांमध्ये मोठी आत्मीयता दिसून येत आहे. त्या प्रत्येक प्रभागात जाऊन नागरिकांच्या अडचणी शांतपणे ऐकून घेत आहेत. पिण्याचे पाणी, रस्ते, कचरा व्यवस्थापन, आरोग्य आणि शैक्षणिक व्यवस्था अशा मूलभूत प्रश्नांवर त्या थेट संवाद साधत आहेत.
शिक्षण आणि विद्यार्थ्याचे भविष्य केंद्रस्थानी
सुवर्णा खताळ यांनी विशेषतः नगरपालिका शाळांची झालेली दुरवस्था, पायाभूत सुविधांचा अभाव आणि विद्यार्थ्याना अद्ययावत सुविधा न मिळणे आदी मुद्द्यांवर जनतेचे लक्ष वेधून घेतले आहे. "संगमनेरचा विकास करायचा असेल, तर मुलांचे भविष्य मजबूत करणे गरजेचे आहे," असे ठाम मत त्या नागरिकांसमोर मांडत आहेत.
पुढील पाच वर्षासाठीचे स्पष्ट विकास व्हिजन
शहरातील पायाभूत सुविधा (रस्ते, पाणी, वीज) मजबूत करणार. स्वच्छ, सुंदर आणि स्मार्ट संगमनेर निर्मिती. महिलांसाठी सुरक्षित आणि विकासाभिमुख उपक्रम राबवणार. नगरपालिका शाळांची उन्नती आणि आधुनिकिकरण. युवकांसाठी रोजगार निर्मितीची नवी दालने खुली करण्यासाठी प्रयत्न करणार असल्याची ग्वाही सुवर्णा खताळ यांनी दिली.