दाढ खुर्द येथील तरुणांवर बिबट्याचा हल्ला!
◻️ वनविभागाने अवघ्या तासाभरात घटनास्थळी लावला पिंजरा
संगमनेर LIVE (आश्वी) | संगमनेर तालुक्यातील दाढ खुर्द येथे सोमवारी दुपारी शेतात चारा कापत असलेल्या तरुणांला बिबट्याने हल्ला करून जखमी केले. हा मुलगा मोठ्याने ओरडल्याने पुढला अनर्थ टळला आहे. दरम्यान घटनेचे गांभीर्य लक्षात घेऊन वनविभागाने अवघ्या तासाभरात घटनास्थळी भेट देऊन पिजंरा लावला आहे.
याबाबत दाढ खुर्दचे सरपंच सतिश जोशी यांच्याकडून मिळालेली माहिती अशी की, सोमवारी (दि. १७) दुपारी ४ वाजेच्या सुमारास ईश्वर सुर्यभान जोशी (वय - १६ वर्ष) हा तरुण जनावरांना चारा कापण्यासाठी शेतात गेला होता. यावेळी शिकारीच्या शोधात दबा धरून बसलेल्या बिबट्याने ईश्वरवर हल्ला केला त्यामुळे ईश्वरच्या पायाला पंजा लागल्याने दुखापत झाली आहे. त्यामुळे घाबरलेल्या ईश्वरने मोठ्याने आरडाओरडा करत तेथून धूम ठोकली. त्यानंतर बिबट्याने झुडपात पलायन केले. ईश्वर पुढे काही अंतर येऊन बेशुद्ध पडला.
घटस्थळी असलेल्या ज्ञानेश्वर तुकाराम जोशी यांनी तिकडे धाव घेत सरपंच सतीश जोशी, ज्ञानेश्वर वाडगे, नाना वाघमारे, बाळासाहेब जोशी, सुर्यभान जोशी, संपत जोशी, संदिप जोरी, सार्थक जोशी, महेश रहाटळ, सोमनाथ आडभाई, बाळासाहेब आडभाई यांच्या मदतीने ईश्वरला लोणी येथील प्रवरा ग्रामीण रुग्णालयात उपचारासाठी दाखल केले. तर, ईश्वरची प्रकृती ठिक असून मोठी दुर्घटना टळली आहे.
दरम्यान सरपंच सतिश जोशी यांनी तात्काळ वनक्षेत्रपाल सुभाष सांगळे यांना संपर्क करुन घटनेबाबत माहिती दिली. घटनेचे गांभीर्य लक्षात घेऊन त्यांनी वनपाल सुजित बोकडे, वनरक्षक रामेश्वर मंडपे, वनसेवक देविदास चौधरी, सुखदेव सूळ, नजीर शेख, उत्तम भुसारी आदि कर्मचाऱ्याना योग्य त्या सूचना दिल्या. क्षणांचाही विलंब न करता या कर्मचाऱ्यांनी अवघ्या तासाभरात घटनास्थळी भेट देऊन बिबट्याला जेरबंद करण्यासाठी पिंजरा लावला आहे. तर, काही तासांपूर्वीचं दाढ खुर्द शिवारात बिबट्याच्या बछड्याला जेरबंद करण्यात वनविभागाला यश आले होते. मात्र, तरी दुसऱ्या दिवशी ही घटना घडल्याने परिसरात दहशतीचे वातावरण आहे.