श्री साईबाबा संस्थांनकडून मुख्यमंत्री सहाय्यता निधीस ५ कोटी रुपयांचे योगदान!
◻️ दुष्काळ निवारणासाठी पालकमंत्री विखे पाटलांच्या उपस्थितीत मुख्यमंत्र्याकडे धनादेश सुपुर्द
संगमनेर LIVE (शिर्डी) | महाराष्ट्रातील दुष्काळी संकटावर मात करण्यासाठी आणि दुष्काळ निवारण उपाययोजनांना बळ देण्यासाठी श्री साईबाबा संस्थान विश्‍वस्त व्यवस्था, शिर्डी यांच्या वतीने मुख्यमंत्री सहाय्यता निधीस ५ कोटी रुपयांचे आर्थिक योगदान देण्यात आले आहे. संस्थानचे मुख्य कार्यकारी अधिकारी गोरक्ष गाडीलकर यांनी हा मदतीचा धनादेश राज्याचे मुख्यमंत्री देवेंद्र फडणवीस यांच्याकडे सुपूर्द केला.
या प्रसंगी राज्याचे जलसंपदा मंत्री तथा अहिल्यानगर जिल्ह्याचे पालकमंत्री राधाकृष्ण विखे पाटील तसेच जलसंपदा मंत्रीगिरीश महाजन उपस्थित होते.
श्री साईबाबा संस्थान केवळ देश-विदेशातून येणाऱ्या लाखो भाविकांना सेवा-सुविधा पुरवण्यापुरते मर्यादित न राहता, सामाजिक बांधिलकीच्या भावनेतून संकटाच्या काळात नेहमीच अग्रेसर राहिले आहे. राज्यातील बळीराजा आणि दुष्काळग्रस्त नागरिकांना दिलासा मिळावा, या उद्देशाने प्रशासकीय पातळीवर राबवल्या जाणाऱ्या उपाययोजनांना हातभार लावण्यासाठी हे ५ कोटींचे योगदान देण्यात आले आहे. संकटकाळात राज्याला दिलेली ही मदत संस्थानच्या सेवाभावी कार्यपरंपरेला साजेसा असा मोठा दिलासा ठरली आहे.
