◻️ आश्वी पोलीस स्टेशन हद्दीत जबरी चोरी झाल्याने खळबळ
संगमनेर LIVE | संगमनेर तालुक्यातील शिबलापूर शिवारात सोमवारी भर दुपारी धाडसी चोरी झाली असून संगिता भिमराज सांगळे यांच्या बंद घराची कडी उघडून ४ लाख ६० हजारांचा मुद्देमाल चोरट्यांनी चोरुन नेल्याची घटना घडली असून याबाबत आश्वी पोलीस ठाण्यात गुन्हा दाखल करण्यात आला आहे.
याबाबत मिळालेली माहिती अशी की, संगिता सांगळे याचे शिबलापूर शिवारातील गट नंबर १२७ मध्ये राहते घर व शेती आहे. सोमवारी दुपारी घराला कडी लावून घरासमोरील लिंबाच्या बागेत लिंब गोळा करण्यासाठी त्या गेल्या होत्या. १ वाजेच्या सुमारास त्या घरी आल्या असता घराचा दरवाजा त्याना उघडा दिसला. त्यामुळे त्यांनी आतमध्ये जाऊन पाहिले असता घरातील सामानाची उचकापाचक केल्याचे दिसुन आले. त्यामुळे संगिता सांगळे यांनी घराशेजारी राहत असलेल्या नागरिकांना बोलावून घेत या घटनेची माहिती देऊन घरातून काय काय चोरीला गेले यांचा शोध घेतला.
यावेळी घरातील लोखंडी कपाटातून ८० हजार रुपये किंमतीची दोन तोळे वजनाची सोन्याची साखळी, २५ हजार रुपये किंमतीची सात ग्रॅम वजनाची सोन्याची अंगठी, १ लाख २० हजार रुपये किंमतीचे तीन तोळे वजनाचे सोन्याचे गंठण, ८० हजार रुपये किंमतीचे दोन तोळे वजनाचे सोन्याचे गंठण, ६० हजार रुपये किंमतीचे दीड तोळे वजनाचे सोन्याचे कानातले, २० हजार रुपये किंमतीचे अर्धा तोळा वजनाचे सोन्याचे कर्णफुले, २० हजार रुपये किंमतीचे अर्धा तोळा वजनाचे सोन्याचे मणी मंगळसूत्र तसेच ५५ हजार रुपये रोख असा एकूण ४ लाख ६० हजारांचा मुद्देमाल चोरीला गेल्याचे दाखल केलेल्या तक्रांरीत म्हटले आहे.
दरम्यान आश्वी पोलीस ठाण्यात याबाबत गुन्हा दाखल करण्यात आला असून पोलीस निरीक्षक संतोष भंडारे यांच्या मार्गदर्शनाखाली पुढील तपास आश्वी पोलीस करत आहेत.
