◻️संगमनेर येथे काँग्रेसची आढावा बैठक संपन्न
◻️शिर्डी लोकसभा मतदारसंघाची उमेदवारी महिलेला देण्याबाबत सौ. दुर्गा तांबे आग्रही
संगमनेर LIVE | शिर्डी लोकसभा मतदार संघासाठी काँग्रेस पक्षाकडून अनेक उमेदवार इच्छुक आहे. याबाबत गटनेते आमदार बाळासाहेब थोरात यांचेही मत प्रामुख्याने विचारात घेतले जाणार असून काँग्रेस पक्षाला पोषक वातावरण असल्याचे प्रतिपादन माजी मंत्री तथा काँग्रेस पक्षाचे निरीक्षक चंद्रकांत हंडोरे यांनी केले आहे.
संगमनेर येथे आयोजित आढावा बैठकीत ते बोलत होते. यावेळी समवेत मतदार संघाचे आमदार लहू कानडे, जिल्हाध्यक्ष राजेंद्र नागवडे, माजी नगराध्यक्ष सौ. दुर्गाताई तांबे, ज्ञानेश्‍वर गायकवाड, करण ससाने, सौ. उत्कर्षा रूपवते, हेमंत ओगले, सचिन गुंजाळ, डॉ. एकनाथ गोंदकर, सचिन गुजर, ज्ञानदेव वाफारे, राजेंद्र वाघमारे, अशोक कानडे, सोन्याबापू वाकचौरे, मीनानाथ पांडे, सुरेश थोरात, तालुकाध्यक्ष मिलिंद कानवडे, शहराध्यक्ष सोमेश्वर दिवटे आदी उपस्थित होते.
पुढे बोलताना हांडोरे म्हणाले की, खोटी आश्वासने देऊन भाजप पक्ष सत्तेत आला असून काँग्रेसला बदलाम केले जात आहे. उद्योग धार्जिणे धोरण राबवून भाजप जातीयवाद ,धर्मवाद प्रांतवाद यांच्या माध्यमातून राजकारण करून विरोधकांचा आवाज दाबण्याचे काम भाजप करत आहे. कोअर कमिटीच्या सूचनेनुसार महाराष्ट्रातील ४८ लोकसभा मतदारसंघाच्या जागाचा आढावा घेण्यासाठी बैठका सुरू आहेत.
यानुसार कोणत्या मतदारसंघात कोणत्या पक्षाचे प्राबल्य जास्त आहे. त्यानुसार जागांची विभागणी केली जाणार आहे. याच माध्यमातून सामान्य जनतेत कार्यकर्त्यांमध्ये काँग्रेस पक्षाचा विचार पोहोचविला जाणार आहे. या बैठकांमध्ये जिल्हा परिषद, पंचायत समिती, नगरपालिका, स्थानिक स्वराय संस्था यांचाही आढावा घेतला जाणार आहे.
शिर्डी लोकसभा मतदारसंघ हा काँग्रेस पक्षाने लढवावा अशी कार्यकर्ते पदाधिकारी यांची मागणी आहे. या निवडीबाबत आमदार बाळासाहेब थोरात व स्क्रीनिंग कमिटी मार्फत योग्य तो निर्णय घेण्यात येईल. पक्षात नवीन पदाधिकार्‍यांना संधी देण्यात येणार आहे. काँग्रेस पक्ष हा तळागाळापर्यंत पोहोचलेला पक्ष असून सर्वसामान्यांचा विकास हीच पक्षाची विचारधारा आहे. देशात व राज्यात सध्या भाजप विरोधात परिवर्तनाची लाट सुरू असून महाराष्ट्रातून सर्वाधिक काँग्रेस खासदार निवडून देण्याचा मानस असल्याचेही ते यावेळी म्हणाले.
यावेळी आमदार लहू कानडे म्हणाले की, शिर्डी लोकसभा मतदार संघात काँग्रेस पक्षासाठी सकारात्मक वातावरण निर्मिती आहे. भाजप जाणीवपूर्वक जातीयवादाचे राजकारण करत असून लोकशाहीसाठी हे धोक्याचे आहे. आमदार बाळासाहेब थोरात यांच्या माध्यमातून येणार्‍या काळात काँग्रेस पक्षाला चांगले दिवस येणार असल्याचेही ते म्हणाले.
यावेळी राजेंद्र नागवडे म्हणाले की, शिर्डी लोकसभा मतदार संघात अस्वस्थता आहे. काँग्रेस पक्षासाठी अनुकूलता आहे. काँग्रेस पक्षाने आमदार थोरात यांच्या मार्गदर्शनाखाली शिर्डी लोकसभा मतदारसंघात उमेदवार द्यावा. शिर्डी लोकसभेत काँग्रेसचा उमेदवार दिल्यास पुन्हा नवचैतन्य निर्माण होईल.
यावेळी सौ. दुर्गाताई तांबे म्हणाल्या की, शिर्डी लोकसभा मतदारसंघात अनेक उमेदवार इच्छुक असून सदर उमेदवारी ही महिलांना देण्याबाबत विचार झाला पाहिजे. काँग्रेस पक्षाची आपण कायम एकनिष्ठ असून पुढील काळातही काँग्रेस पक्षाशी एकनिष्ठता असणार असल्याचेही त्या यावेळी म्हणाल्या.
यावेळी करण ससाने, हेमंत ओगले, ज्ञानेश्‍वर गायकवाड, सौ. उत्कर्षा रुपवते, समन्वयक सचिन गुंजाळ, ज्ञानदेव वाफारे, डॉ. एकनाथ गोंदकर, सचिन गुजर, सौ. अर्चनाताई बालवाडे, आकाश नागरे, पंकज लोंढे, मीनानाथ पांडे, तुषार पोटे आदी जणांनी आपली मनोगते व्यक्त केली.
यावेळी अजय फटांगरे, सौ. सुनंदाताई जोर्वेकर, पद्माताई थोरात, बेबीताई थोरात, के. के. थोरात, सुभाष सांगळे, सुधीर नवले, ज्ञानेश्‍वर मुरकुटे, निखिल पापडेजा, गौरव डोंगरे, रमेश गफले आदी मान्यवर उपस्थित होते.
दरम्यान या कार्यक्रमाचे प्रास्ताविक ज्ञानदेव वाफारे यांनी केले. सूत्रसंचालन मिलिंद कानवडे यांनी केले तर आभार सोमेश्वर दिवटे यांनी मानले. यावेळी अहमदनगर जिल्ह्यातील पदाधिकारी कार्यकर्ते उपस्थित होते.
डॉ. तांबे यांना सन्मानाने काँग्रेसमध्ये घेण्याचा ठराव एकमुखाने मंजुर
माजी आमदार डॉ. सुधीर तांबे यांना पुन्हा काँग्रेस पक्षामध्ये संधी मिळावी अशी येथील कार्यकर्त्यांची भावना आहे. त्यामुळे डॉ. तांबे यांना सन्मानाने काँग्रेसमध्ये घ्या असा ठराव आज जिल्हा काँग्रेसच्या बैठकीत करण्यात आला. यावर निरीक्षक हांडोरे यांनी सकारात्मक प्रतिसाद देत सदर मागणी प्रदेश काँग्रेसकडे कळवू असे आश्‍वासन दिले.
