सादतपूर शिवारात एक बिबट्या जेरबंद मात्र, शोधमोहीम सुरुचं राहणार!
◻️ बिबट्याच्या हल्ल्यात पाच वर्षाचा चिमुकला झाला होता ठार
◻️ वनविभागाच्या विशेष पथकाकडून शोधमोहीम सुरुचं; दक्षतेचे आवाहन
संगमनेर LIVE (आश्‍वी) | राहाता तालुक्यातील लोणी येथील बिबट्याच्या प्राणघातक हल्ल्याच्या दुर्दैवी घटनेनंतर सादतपूर (ता. संगमनेर) शिवारातील गोरे वस्तीवरील ५ वर्षीय चिमुकल्यावर बिबट्याने हल्ला करुन ठार केल्याची घटना गुरुवार (दि. २५) दुपारी ४.३० वाजेच्या सुमारास घडल्यानंतर एकचं खळबळ उडाली होती.
त्यामुळे तात्काळ पालकमंत्री राधाकृष्ण विखे पाटील यांनी दोन्ही घटनास्थळी भेट देऊन बिबट्या जेरबंद करण्यासाठी वनविभागाला सूचना केल्या होत्या. त्यानुसार डोळ्यात तेल घालून वनविभागाकडून शोधमोहीम सुरू असताना सोमवारी मध्यरात्री सादतपूर शिवारात एक बिबट्या जेरबंद करण्यात यश आले आहे.
वनविभागाने पुणे, जुन्नर व नाशिक येथील विशेष पथकाला बिबट्या जेरबंद करण्यासाठी पाचारण केले होते. मागील चार दिवसांपासून हे पथक व स्थानिक वनविभागाचे अधिकारी बिबट्याचा कसून शोध घेत होते. त्यांनी सादतपूर शिवारात ठिकठिकाणी तीन ते चार पिंजरे लावून शोधमोहीम सुरू ठेवली होती.
सोमवारी मध्यरात्री दीड वाजेच्या सुमारास मगर वस्तीनजीक लावलेल्या पिजंऱ्यात एक बिबट्या जेरबंद करण्यात वनविभागाला यश आले आहे. यावेळी संगमनेर परिक्षेत्राचे वनरक्षक साळु सोनवणे, सहायक उप वनसंरक्षक सौ. सुवर्णा माने, कोपरगाव परिक्षेत्राचे सागर केदार, विशेष पथकातील अभिजित महाले, संतोष पारधी, पोलीस पाटील सुनील मगर, प्राणीमित्र विकास म्हस्के आदिसह वनविभागाचे कर्मचारी उपस्थित होते.
दरम्यान हल्ला झालेल्या ठिकाणापासून अवघ्या पाचशे मीटर अंतरावर हा बिबट्या जेरबंद झाला असला तरी, चिमुकल्याला ठार करणारा बिबट्या हाचं होता की दुसरा? याबाबत कोणताही ठोस दावा करता येणार नसल्याने सादतपूर परिसरातील नागरिकांनसह शिवा लगतच्या गावातील नागरीकानी दक्षता घ्यावी असे आवाहन करुन बिबट्याची शोधमोहीम सुरूचं राहणार असल्याची माहिती संगमनेर भाग २ चे वनरक्षक साळु सोनवणे यांनी दिली आहे.
