श्रीसंत निवृत्तीनाथ महाराज पालखी मार्गाचे काम आषाढी वारीपुर्वी पूर्ण करा

श्रीसंत निवृत्तीनाथ महाराज पालखी मार्गाचे काम आषाढी वारीपुर्वी पूर्ण करा

◻️ पालकमंत्री ना. राधाकृष्ण विखे पाटील यांच्या सूचना

संगमनेर LIVE | श्रीसंत निवृत्तीनाथ महाराज पालखी मार्गाचे काम आषाढी वारीपुर्वी निर्धारीत वेळेत पूर्ण करा. हे काम करताना कामाची गुणवत्ता राखा, वारकऱ्यांसाठी तयार होत असल्याने या मार्गाच्या कामाबाबत अधिकाऱ्यांनीही अधिक सजग राहून हे काम पूर्ण करुन घेण्याच्या सुचना महसूल तथा पालकमंत्री ना. राधाकृष्ण विखे पाटील यांनी दिल्या आहेत.

आषाढी वारीच्या पार्श्वभूमीवर दरवर्षी श्रीक्षेत्र त्र्यंबकेश्वर येथून विश्वगुरु श्रीसंत निवृत्तीनाथ महाराज याला पायी पालखी सोहळा हा तालुक्यातून मार्गस्थ होत असतो. सिन्नर हद्द ते पारेगाव बुद्रुक या मार्गाचे मार्गाचे काम अनेक वर्षापासून होतच नव्हते. राज्यात महायुतीचे सरकार आल्यानंतर या रस्याारच्या कामाचा प्रस्ताव सार्वजनिक बांधकाम विभागामार्फत पाठविण्यात आला होता. याप्रस्तावाला प्रशासकीय तसेच तांत्रिक मान्यताही मिळाल्यानंतर पालकमंत्री ना. राधाकृष्ण विखे पाटील यांच्या पाठपुराव्यामुळे सुमारे २ कोटी ३० लाख ८७ हजार रुपयांचा निधी उपलब्ध झाला आहे.

संत निवृत्तीनाथ महाराजांची पालखी त्र्यंबकेश्वर येथून २० जून रोजी मार्गस्थ होणार आहे. २७ जून रोजी परंपरेप्रमाणे तालुक्यातील पारेगाव येथे या पालखीचा मुक्काम असणार आहे. या पार्श्वभूमीवर या पालखीमार्गाच्या सुरु असलेल्या कामाची माहिती मंत्री विखे पाटील यांनी जाणून घेतली. तसेच या मार्गाच्या कामाबाबत प्रांताधिकारी तसेच सार्वजनिक बांधकाम विभागाच्या अधिकाऱ्यांना प्रत्यक्ष जावून पाहाणी करण्याच्या सूचना त्यांनी दिल्या होत्या. त्यानुसार आज प्रांताधिकारी तसेच सार्वजनिक बांधकाम विभागाच्या अधिकाऱ्यांनी कामाची पाहाणी केली आहे.

सदर मार्गाचे काम अधिक दर्जेदार आणि गुणवत्तेने पूर्ण करावे. महायुती सरकारने या मार्गाला मोठा निधी उपलब्ध करुन दिला आहे. एका आध्यात्मिक कार्यासाठी हा मार्ग होणार असल्याने या कामाची वेगळेपणही दाखवून द्या अशा सुचनाही मंत्री विखे पाटील यांनी अधिकाऱ्यांना दिल्या आहेत.