आश्वी पोलीस ठाणे येथे शिक्षक व कर्मचाऱ्याची बैठक संपन्न
◻️ पोलीसांकडून शाळांना सीसीटीव्ही लावण्यासह विविध मार्गदर्शनपर सुचना
संगमनेर LIVE (आश्वी) | बदलापूर येथील दुर्दैवी घटनेच्या पार्श्वभूमीवर आश्वी पोलिसांकडून कार्यक्षेत्रातील शाळा, महाविद्यालयातील शिक्षक व कर्मचारी यांची नुकतीच बैठक आयोजित केली होती. यावेळी शाळा, महाविद्यालयातील सुरक्षा, विद्यार्थी वाहतूक करणाऱ्या वाहनचालकांची माहिती, तसेच विद्यार्थ्याच्या सुरक्षेवर चर्चा करण्यात आली.
बैठकीवेळी पोलीस निरीक्षक संजय सोनवणे शिक्षकांना मार्गदर्शन करताना म्हणाले की, शाळा, महाविद्यालय येथे सीसीटीव्ही कॅमेरे तात्काळ लावण्यात यावेत व सदर सीसीटीव्ही कॅमेर्याची नियमित तपासणी करावी, शाळा महाविद्यालयात तक्रार सुरक्षित ठिकाणी बसवून ती नियमित उघडून त्यातील तक्रारींचे निवारण करणे, लहान मुलांना वॉशरूम करिता ने आण करण्याकरता महिला मदतनीस यांची नेमणूक करावी, शाळांमध्ये असलेले शिक्षकेतर कर्मचारी, कंत्राटी कर्मचारी यांची चारित्र्य पडताळणी करून घ्यावी, स्कूल बस मध्ये विद्यार्थी ने आण करणे करिता महिला मदतनीस यांची नेमणूक करण्यात यावी, शाळा, महाविद्यालय येथे असणारे पुरुष सफाई कामगार मद्य सेवन करणार नाहीत याची दक्षता घ्यावी तसेच शासन परिपत्राचे काटेकोरपणे पालन करावे असे आवाहन त्यानी केले.
बदलापूरातील घटनेनंतर राज्यभरात संतप्त पडसाद उमटले. या घटनेनंतर शाळा, महाविद्यालयातील सुरक्षेबाबत प्रश्न उपस्थित करण्यात आला. राज्य शासनाने शाळा, महाविद्यालय प्रशासनाला सूचना दिल्या आहेत. त्यामुळे आश्वी पोलिसांनी देखील सुरक्षेबाबत आढावा घेण्यास सुरुवात केली आहे.
दरम्यान यावेळी उपस्थित शिक्षकांनी पोलीसाना शाळा व महाविद्यालयात येऊन मार्गदर्शन करण्याबरोबरच शाळा भरताना व सुटताना गस्त वाढवण्याची विनंती केली आहे. याप्रसंगी पोलीस उपनिरीक्षक दीपक बर्डे, पोलीस हवालदार प्रवीण रणधीर, आनंद वाघ, विजय काळे आदिंसह शाळेतील शिक्षक व कर्मचारी उपस्थित होते.