भविष्यातील महायुतीचा विरोधी पक्षनेता कोण? हे फडणवीसानी ठरवावे - बाळासाहेब थोरात

भविष्यातील महायुतीचा विरोधी पक्षनेता कोण? हे फडणवीसानी ठरवावे - बाळासाहेब थोरात

◻️ महाविकास आघाडी राज्यात विधानसभेच्या १८० जागा जिंकणार

संगमनेर LIVE (पंढरपूर) | महाविकास आघाडीचे विधानसभेच्या अनुषंगाने जागा वाटप अंतिम टप्प्यात आले आहे. निवडूण येईल हा निकष ठेवण्यात आला आहे. त्यामुळे येणाऱ्या विधानसभा निवडणुकीत महाविकास आघाडी १८० जागा जिंकेल, असा विश्वास काँग्रेसचे नेते बाळासाहेब थोरात यांनी व्यक्त करताना भविष्यात महायुतीचा विरोधी पक्षनेता कोण होणार हे फडणवीस यांनी ठरवावे, अशी बोचरी टीका देखील केली.

काँग्रेसचे जेष्ठ नेते बाळासाहेब थोरात अकलूज येथे पत्रकारांशी संवाद साधताना भाजपावर कडाडून टीका केली. ते म्हणाले, भाजपाची कृती लोकशाही विरोधी आहे. ऑपरेशन लोटस याचा अर्थ पैसा द्यायचा व आमदार फोडायचा असा आहे. जनतेला भाजपाची नीती समजली आहे असे ते म्हणाले. 

‘मराठा समाजाला न्याय मिळावा’

मराठा समाजाला न्याय मिळावा ही भूमिका आहे. पृथ्वीराज चव्हाण यांनी या बाबत प्रयत्न केले. आमची सत्ता गेली. त्यानंतर न्यायालयात बाजू मांडली नाही. मात्र १६ टक्के आरक्षण देणे शक्य आहे असे थोरात म्हणाले. मराठा समाजाला आरक्षण व संधी मिळाली पाहिजे मग कोणत्याही पद्धतीने मिळावी असे त्यांनी मत मांडले. राज्यात महायुती बाबत नाराजी आहे. तर दुसरीकडे महाविकास आघाडीमध्ये जागा वाटप अंतिम टप्प्यात आले असल्याचे थोरात यांनी सांगितले.