संगमनेर येथे वाहनाचा धक्का लागल्यामुळे कमान कोसळली
◻️ कमानीला धक्का देणाऱ्या वाहनाचा महायुतीच्या कार्यकर्त्याकडून शोध सुरू
◻️ शिवजयंतीला शिवप्रेमींनी उत्स्फूर्त प्रतिसाद दिल्यामुळे विरोधकांकडून कमानीचे राजकारण
संगमनेर LIVE | संगमनेर शहरातील बसस्थानकाजवळ महायुतीच्यावतीने उभारण्यात आलेली छत्रपती शिवाजी महाराज जन्मोत्सव सोहळ्याच्या कमानीला विरोधी बाजूने जाणाऱ्या वाहनाचा धक्का लागल्यामुळे ही कमान आज कोसळली. छत्रपती शिवरायांच्या प्रतिमेचा कुठल्याही प्रकारे अपमान होऊ न देता महायुतीच्या सर्व कार्यकर्त्यानी अवघ्या काही मिनिटात कोसळलेली कमान बाजूला केली. त्या कमानीला धक्का देणाऱ्या वाहनाचा महायुतीचे कार्यकर्ते शोध घेत असल्याची माहिती महायुतीच्या कार्यकर्त्यानी दिली.
संगमनेर शहरात तिथीनुसार शिवजयंती मोठ्या उत्साहात साजरी झाली. या उत्सवाच्या निमित्ताने बसस्थानकासमोर महायुतीच्या वतीने स्वागत कमान उभारण्यात आली होती. छत्रपती शिवाजी महाराज जन्मोत्सव सोहळ्यानिमित्त शहरातून मिरवणुक निघाली होती. या मिरवणुकीत शिवप्रेमी मोठ्या संख्येने उस्फूर्तपणे सहभागी झाले होते. विरोधकांच्या मिरवणूकीकडे शिवप्रेमींनी पाठ फिरवली. त्यामुळे विरोधक तोंडघशी पडले. मात्र त्यांच्याकडे राजकारणासाठी काही शिल्लक राहिले नसल्यामुळे त्यांनी आता वाहनाच्या धक्क्याने कोसळलेल्या छत्रपती शिवाजी महाराजांच्या कमानीवर राजकारण सुरू केले असल्याची टीका महायुतीच्या कार्यकर्त्यानी केली.
छत्रपती शिवाजी महाराज जयंती निमित्त बसस्थानका जवळ उभारलेल्या स्वागत कमानीला बस स्थानकाजवळून विरोधी बाजूने जाणाऱ्या वाहनाचा धक्का लागला असता ती कमान कोसळली होती. हे समजतात बस स्थानकाजवळ असणारे महायुतीचे कार्यकर्ते तात्काळ तिथे गेले आणि कोसळलेली कमान आणि छत्रपती शिवाजी महाराजांचे छायाचित्र कुणाच्या पायाखाली येणार नाही याची कार्यकर्त्यानी दक्षता घेत अवघ्या पंधरा ते वीस मिनिटात कोसळलेल्या कमानीचे फ्लेक्स बाजूला केले. त्यामुळे छत्रपती शिवाजी महाराज यांचा अवमान झाला नाही. विरोधकांना राजकारणासाठी कुठलेच मुद्दे शिल्लक राहिले नसल्यामुळे त्यांनी आता छत्रपती शिवाजी महाराज यांच्या कोसळलेल्या कमानीचे राजकारण सुरू केले असल्याचा आरोप महायुतीच्या स्थानिक नेत्यांनी केला आहे.
मागील ४० वर्षात विरोधकांना छत्रपती शिवाजी महाराज यांची जयंती कधीही साजरी करण्याचे सुचले नाही. मात्र या तालुक्यात परिवर्तन झाल्यानंतर छत्रपती शिवाजी महाराजांची तारखेनुसार आणि तिथीनुसार होणारी शिवजयंती महायुतीने साजरी केली. या दोन्ही मिरवणुकींना शिवप्रेमींनी उत्स्फूर्त प्रतिसाद दिला.
त्यामुळे विरोधकांनी या कोसळलेल्या कमानीचे राजकारण सुरू केले आहे. परंतु संगमनेरची जनता आता विरोधकांना भीक घालणार नाही. अशी टीका शिवसेनेचे शहर प्रमुख विनोद सूर्यवंशी, दिनेश फटांगरे, भाजप शहर सरचिटणीस राहुल भोईर, भाजप युवा मोर्चाचे शहराध्यक्ष शशांक नामन, आरपीआयचे शहराध्यक्ष कैलास कासार यांनी केली आहे.