संगमनेरसाठी आलेल्या नव्या पाच बसची आमदार अमोल खताळाच्या हस्ते पूजा
◻️ आणखी पाच बस लवकरच येणार असल्याची आमदार खताळ यांची ग्वाही
◻️ विधानसभा सदस्यासाठी राखीव असलेल्या सीटवर बसून केला लालपरीतून प्रवास
संगमनेर LIVE | संगमनेर आगारासाठी १० नवीन एसटी बसेस उपलब्ध करून देण्यात याव्यात अशी मागणी आमदार अमोल खताळ यांनी राज्याचे परिवहनमंत्री प्रताप सरनाईक यांच्याकडे केली होती. या मागणीचा विचार करून संगमनेर आगारासाठी ५ नवीन एसटी बसेस उपलब्ध करून दिल्या आहेत. उर्वरित ५ एसटी बसेस लवकरच उपलब्ध होतील अशी ग्वाही आमदार अमोल खताळ यांनी दिली.
संगमनेर आगारात एसटी बसेसची संख्या कमी प्रमाणात असल्यामुळे प्रवाशांचे अतोनात हाल होत आहेत. त्यामुळे १० एसटी बसेस उपलब्ध करून द्याव्यात अशी मागणी आ. अमोल खताळ यांनी परिवहनमंत्री प्रताप सरनाईक यांच्याकडे केली होती. त्यानुसार संगमनेर आगारासाठी ५ एसटी बसेस तात्काळ उपलब्ध करून दिल्या जातील, असे आश्वासन दिले होते. त्यानुसार शनिवारी संगमनेर आगाराला ५ नवीन एसटी बसेस दाखल झाल्या. त्या बसेसचे पूजन आमदार अमोल खताळ यांच्या उपस्थितीत करण्यात आले.
आमदार खताळ म्हणाले की, उपमुख्यमंत्री एकनाथ शिंदे, परिवहनमंत्री प्रताप सरनाईक, पालकमंत्री विखे पाटील यांच्या माध्यमातून संगमनेर बस आगारात ५ नवीन एसटी बसेस दाखल झाल्या आहेत. या एसटी बसमध्ये विधानसभा सदस्यासाठी राखीव असलेल्या सीटवर बसून प्रवास केल्याचे मला समाधान आहे. येथून मागील कालावधीत एसटी महामंडळ तोट्यात गेले होते.
मात्र, उपमुख्यमंत्री एकनाथ शिंदे यांच्या माध्यमातून अनेक कल्याणकारी योजना राबविल्या गेल्या आहेत. तसेच महिलांना एसटीमध्ये ५० टक्के सवलत दिली गेली आहे. त्यामुळे लाडक्या बहिणींचा एसटीकडे कल वाढला आहे. त्यामुळे तोट्यात गेलेले एसटी महामंडळ नफ्यामध्ये येत आहे. संगमनेर आगाराच्या विकासासाठी लागणारा निधी आणण्यासाठी आपण प्रयत्न करणार असल्याचे सांगून आमदार खताळ म्हणाले की, एसटी बसमधून प्रवास करताना प्रत्येक प्रवाशांनी बस स्थानकाची आणि बसची स्वच्छता राखावी असे आवाहन केले.
तसेच शहरातील वाहतूक समस्या गंभीर बनली आहे. याबाबत उपाययोजना करण्यासाठी पोलीस प्रशासनाला सूचना दिलेल्या आहेत. त्यानुसार लवकरच संगमनेर शहरात स्वतंत्र वाहतूक शाखा कार्यान्वित केली जाईल. आणि वाहतूक कोंडीचा प्रश्न सोडविला जाईल. अशी माहिती देखील आमदार खताळ यांनी यावेळी दिली.
संगमनेरचे आगार व्यवस्थापक प्रशांत गुंड यांनी आमदार अमोल खताळ यांचा सन्मान केला. या वेळी शिवसेनेचे तालुका प्रमुख रामभाऊ राहाणे, रमेश काळे, राजेंद्र सोनवणे, शहरप्रमुख दिनेश फटांगरे, अंकुश राहणे, श्याम राहणे, रिपाइंचे कैलास कासार, विनोद सूर्यवंशी, सौरभ देशमुख, दादाभाऊ गुंजाळ, ज्ञानेश्वर कर्पे, जावेद जाहागीरदार, शौकत जागीरदार, अशोक कानवडे, रौफ शेख, मयूर दिघे, महेश मांडेकर, सुरेश लांडगे, रावसाहेब चकोर, नंदू कानकाटे, भगवान गिते, किसन घुमरे, सुदर्शन हेकरे, रुपेश टोपे, विजय देशमुख, करंजकर, बापू भुसारी आदीसह महायुतीचे कार्यकर्ते मोठ्या संख्येने उपस्थित होते.
आमदार अमोल खताळ यांनी लालपरीतून केला प्रवास..
संगमनेर आगारांमध्ये नव्याने दाखल झालेल्या लालपरी एसटीबसमध्ये विधान सभा सदस्यासाठी आरक्षित असलेल्या सीटवर बसून आमदार अमोल खताळ यांनी महायुतीच्या पदाधिकाऱ्यांसमववेत प्रवास केला.