पिंप्री - लौकी येथील चोरीच्या गुन्ह्यातील तीन आरोपी जेरबंद
◻️ ८ लाख ५७ हजार ३९२ रुपये किंमतीचा मुद्देमाल जप्त
◻️ स्थानिक गुन्हे शाखा अहिल्यानगरची मोठी कारवाई
संगमनेर LIVE (आश्वी) | संगमनेर तालुक्यातील आश्वी पोलीस स्टेशन हद्दीतील पिंप्री लौकी फाटा येथे कृषी सेवा केंद्रात चोरी करणारे तीन आरोपी जेरबंद करण्यात स्थानिक गुन्हे शाखा, अहिल्यानगर यांना यश आले असून आरोपीकडून ८ लाख ५७ हजार ३९२ रपये किंमतीचा मुद्देमाल जप्त करण्यात आला आहे.
याबाबत अधिक माहिती अशी की, दि. १५/०५/२०२५ रोजी फिर्यादी संदीप पोपट गिते, रा. पिंप्री - लौकी, ता. संगमनेर हे त्यांचे कृषी सेवा केंद्र बंद करून घरी गेले असता अज्ञात आरोपीनी त्यांचे दुकानाचा पत्रा उचकटुन त्यामधील माल चोरून नेला होता. याबाबत आश्वी पोलीस स्टेशन येथे गु. र. नं. १०४/२०२५ बीएनएस कलम ३३१ (१), ३०५ (अ) प्रमाणे घरफोडीचा गुन्हा दाखल करण्यात आला होता.
पोलीस अधीक्षक राकेश ओला यांनी या घटनेची दखल घेऊन स्थानिक गुन्हे शाखेचे पोलीस निरीक्षक दिनेश आहेर यांना हा गुन्हा उघडकीस आणणेबाबत आदेश दिले होते. त्यानुषंगाने पोलीस दिनेश आहेर यांनी स्थानिक गुन्हे शाखेचे पोलीस अंमलदार संदीप पवार, गणेश धोत्रे, फुरकान शेख, प्रमोद जाधव, मयुर गायकवाड, प्रशांत राठोड व महादेव भांड यांचे पथक नेमुण घरफोडी गुन्हा उघडकीस आणणेबाबत सुचना व मार्गदर्शन केले.
दिनांक २१/०५/२०२५ रोजी पथक गोपनीय माहिती व तांत्रीक विश्लेषणाच्या आधारे तपास करत असताना तीन इसम हे त्यांचेकडील पीकअप गाडी (एमएच २१ बीएच ५४४३) मधुन अहिल्यानगर ते छत्रपती संभाजीनगर जाणारे रोडलगत आशिर्वाद मंगल कार्यालयाजवळ शेतीचे औषधे संशयास्पद विकत असल्याची माहिती मिळाली.
त्यामुळे तात्काळ पथकाने घटनास्थळी जाऊन गणेश आव्हाड (वय - २३), राज गायकवाड (वय २४), आदित्य इंगोले (वय २३) सर्व राहणार अहील्यानगर यांना ताब्यात घेतले. यावेळी पथकाने आरोपीचे ताब्यातील पीकअपची पाहणी केली असता, त्यामध्ये शेतीचे औषधे व रसायन मिळून आले. महिंद्रा कंपनीचा पीकअप, शेतीचे कीटकनाशक, औषधे व मोबाईल असा एकूण ८ लाख ५७ हजार ३९२ रुपये किंमतीचा मुद्देमाल यावेळी पोलीसांनी जप्त केला.
याप्रसंगी आरोपीकडे विचारपूस केली असता त्यांनी दि. १६/०५/२०२५ रोजी पहाटे पिंप्री -लौकी फाटा (ता. संगमनेर) येथून एका कृषी सेवा केंद्राचा पत्रा उचकटुन चोरी केल्याची माहिती सांगितली. ताब्यातील आरोपीना जप्त करण्यात आलेल्या मुद्देमालासह आश्वी पोलीस स्टेशन येथे हजर करण्यात आले असून गुन्हयाचा पुढील तपास आश्वी पोलीस स्टेशन करीत आहे.
दरम्यान ही कारवाई पोलीस अधीक्षक राकेश ओला, श्रीरामपूरचे अपर पोलीस अधीक्षक वैभव कलुबर्मे, संगमनेरचे उपविभागीय पोलीस अधिकारी कुणाल सोनवणे यांचे सुचना व मार्गदर्शनाखाली स्थानिक गुन्हे शाखेचे पोलीस निरीक्षक दिनेश आहेर व त्यांच्या सहकाऱ्यांनी केली.