दाढ खुर्द येथे कृषि दुतांचे आगमन!
◻️ शेतकऱ्यांना विविध कृषि विषयक समस्यावर मार्गदर्शन करणार
संगमनेर LIVE | संगमनेर तालुक्यातील दाढ खुर्द या गावात श्रमशक्ती कृषि महाविद्यालय मालदाड येथील कृषि दुतांचे आगमन झाले आहे. पुढील तीन महिन्यासाठी ते गावात वास्तव्यास राहून शेतकऱ्यांना विविध कृषि विषयक मार्गदर्शन करणार आहेत. या कृषिदुतांचे दाढ खुर्द येथे ग्रामपंचायत व शेतकऱ्यांच्या वतीने स्वागत करण्यात आले.
सेवा संस्कार संस्थेच्या अंतर्गत श्रमशक्ती कृषि महाविद्यालय मालदाड येथे हे विद्यार्थी शिक्षण घेत आहे. संस्थेचे संस्थापक साहेबराव नवले आणि प्राचार्य डॉ. अरविंद हारदे यांच्या मार्गदर्शनाखाली कार्यक्रम समन्वयक प्रा. निलेश तायडे, कार्यक्रम अधिकारी डॉ. बी. पी. सुद्रिक, प्रा. बी. डी. तायडे यांच्या सूचनेनुसार अक्षय राजगुरू, कौस्तुभ रोहकले, मयुर अगावणे, विवेक पुंडे, साहिल सातकर, कृष्णा काळे, अविष्कार भोत हे दाढ खुर्द येथील शेतकऱ्यांचे अनुभव जाणून घेत त्यांना मार्गदर्शन करणार आहेत.
याप्रसंगी सरपंच सतिश जोशी, ग्रामसेवक संग्राम चांडे, शेतकरी व ग्रामस्थ उपस्थित होते. दरम्यान कृषि दुतांच्या माध्यमातून शेतकऱ्यांना जैविक शेती, विविध सिंचन पद्धती, सुधारित शेती पद्धती, पीक नियोजन, खत व्यवस्थापन, रासायनिक खतांची योग्य हाताळणी आणि विविध सरकारी योजनांचा लाभ कसा मिळावा याबाबतचे मार्गदर्शन होईल. या उपक्रमामुळे गावातील शेतीत नक्कीच सकारात्मक बदल घडतील, असा विश्वास व्यक्त करण्यात आला.