डिग्रस येथे शाळेत निघालेल्या मुलीवर बिबट्याचा प्राणघातक हल्ला!
◻️ संगमनेर शहरातील खाजगी रुग्णालयात उपचार सुरू
संगमनेर LIVE (आश्‍वी) | संगमनेर तालुक्यात बिबट्यांच्या हल्ल्याच्या घटनांमध्ये दिवसेंदिवस वाढ होत असून तालुक्यातील डिग्रस येथे शनिवारी सकाळी शाळेत जात असलेल्या ९ वी तील विद्यार्थीनीवर बिबट्याने प्राणघातक हल्ला केला. विद्यार्थीनीवर संगमनेर येथील रुग्णालयात उपचार सुरू असून मुलीची प्रकृती स्थिर आहे.
याबाबत मिळालेली माहिती अशी की, डिग्रस येथिल माध्यमिक विद्यालयात इयत्ता ९ वीत शिक्षण घेत असलेली विद्यार्थ्यीनी कु. प्रगती सखाराम श्रीराम ही शनिवार दि. ११ ऑक्टोबर रोजी सकाळी ७.१५ वाजेच्या सुमारास शाळेत जात होती. यावेळी लींब फाटा येथे ती आली असता झुडपात शिकारीच्या शोधात दबा धरुन बसलेल्या बिबट्याने प्रगतीवर प्राणघातक हल्ला केला. त्यामुळे प्रगती मोठ्याने ओरडल्याने रस्त्याने येत असलेल्या देवराम तुळाजी खेमनर यांनी घटनास्थळी धाव घेऊन प्रगतीला बिबट्याच्या तावडीतून सोडवले. यावेळी स्थानिकांच्या मदतीने प्रगतीला संगमनेर शहरातील एका खाजगी रुग्णालयात उपचारासाठी दाखल करण्यात आले आहे.
प्रगतीच्या गळ्याला आणि मानेला गंभीर दुखापत झाली आहे. या घटनेची माहिती मिळताच गट शिक्षणाधिकारी बाळासाहेब गुंड, शिक्षण विस्तार अधिकारी मंगला कलगुंडे - हिरगळ, केंद्र प्रमुख बाळासाहेब जाधव, सोमेश्वर सेवाभावी संस्थेचे सचिव जानकीराम पुणेकर, मुख्याध्यापक बाचकर, शेख, शिक्षक श्रीपाद पांढरे आदिनी रुग्णालयात जाऊन प्रगतीच्या प्रकृतीची माहिती घेतली.
दरम्यान या घटनेची माहिती मिळताच वनविभागाने घटनास्थळी धाव घेत पिंजरा लावून बिबट्या जेरबंद करण्याची प्रक्रिया सुरू केली आहे. तर, मागील आठवड्यात देखील एका मुलीला बिबट्या याचं परिसरात आडवा झाला होता. ही घटना ताजी असतानाच अवघ्या काही दिवसांत याचं ठिकाणी बिबट्याचा हल्ला झाल्यामुळे परिसरात मोठी दहशत निर्माण झाली आहे.