‘विरोधकांना चाळीस वर्षे दिली, आम्हाला फक्त पाच वर्ष द्या!’
◻️ पालकमंत्री विखे पाटलांचे संगमनेर शहर विकासासाठी महायुतीला संधी देण्याचे आवाहन
संगमनेर LIVE | जलसंपदा आणि जिल्ह्याचे पालक मंत्री नामदार राधाकृष्ण विखे पाटील यांनी महायुतीच्या प्रचारादरम्यान संगमनेर शहरातील प्रत्येक प्रभागात नागरीकांशी थेट संवाद साधत शहर विकासाची तळमळ व्यक्त केली. शहराला विकास हवा आहे आणि महायुती सरकारने दिलेल्या आश्वासनांची पूर्तता करण्याचे काम निश्चित होईल, अशी ग्वाही त्यांनी यावेळी दिली. विरोधकांना आपण चाळीस वर्षांचा प्रदीर्घ काळ दिला, आता आम्हाला केवळ पाच वर्षाची संधी द्यावी, असे भावनिक आवाहन मंत्री विखे पाटील यांनी मतदारांना केले.
प्रलंबित आरक्षणाचे प्रश्न मार्गी लागणार
प्रचार दौऱ्यादरम्यान मंत्री विखे पाटील यांनी प्रभागातील समस्या जाणून घेतल्या आणि शहर विकासाच्या सूचनांचे स्वागत केले. अनेक प्रभागांत वर्षानुवर्षे आरक्षणाचे प्रश्न प्रलंबित आहेत. यावर बोलताना त्यांनी स्पष्ट केले की, निवडणूक संपताच यासंदर्भात शासन स्तरावर निश्चित कार्यवाही करून नागरीकांना न्याय देण्याचे आश्वासन त्यांनी दिले.
रोजगार, बचत गट आणि नामकरण
शहरातील तरुणांसाठी रोजगार निर्मितीच्या दृष्टीने महत्त्वाचे पाऊल उचलण्यात येणार आहे. औद्योगिक वसाहतीची अंमलबजावणी होणार असली तरी, सद्य परिस्थितीत आयटीआय झालेल्या युवकांना शिर्डी येथील औद्योगिक वसाहतीमध्ये संधी उपलब्ध आहेत.
महिला सबलीकरणावर जोर देत, महिला बचत गटांच्या उत्पादित मालाच्या विक्री व्यवस्थेसाठी सक्षम यंत्रणा कार्यान्वित करण्याबाबत प्रयत्न करण्याचे आश्वासन त्यांनी दिले. शहरातील शिवाजी नगर परिसराचे नाव 'छत्रपती शिवाजी महाराज नगर' असे करण्याची एका युवकाने केलेली सूचना त्यांनी त्वरित उचलून धरली. केवळ नावच नाही, तर या नावाची भव्य कमान उभी करू, असे आश्वासन त्यांनी दिले.
अतिक्रमणधारकांना दिलासा
अतिक्रमण म्हणून नोंदणी असलेल्या घरमालकांना मोठा दिलासा देण्यासाठी सर्वसमावेशक धोरण घेण्याबाबत शासन स्तरावर प्रयत्न करणार असल्याचे मंत्री विखे पाटील यांनी नमूद केले.
यावेळी आमदार अमोल खताळ यांनीही संगमनेरच्या विकासाला पालकमंत्री विखे पाटील यांच्या माध्यमातून प्राधान्य दिले जाईल, असे सांगितले. महायुती सर्वसामान्य नागरीकांच्या पाठीशी खंबीरपणे उभी असून, यापूर्वीही प्रत्येक प्रभागासाठी पायाभूत सुविधांचा निधी उपलब्ध करून दिला आहे, असे विखे पाटील यांनी ठामपणे सांगितले.
दरम्यान याप्रसंगी महायुतीच्या नगराध्यक्ष पदाच्या उमेदवार सुवर्णा खताळ, श्रीराम गणपुले यांच्यासह महायुतीचे प्रमुख पदाधिकारी आणि कार्यकर्ते मोठ्या संख्येने उपस्थित होते.