श्रीरामपूरमध्ये 'शिव आरोग्य सेना' प्रमुख डॉ. महेश शिरसागर भाजपमध्ये
◻️ पालकमंत्री विखे पाटलांच्या उपस्थितीत पक्षप्रवेश; शिवसेना (उबाठा) गटाला धक्का
संगमनेर LIVE (श्रीरामपूर) | श्रीरामपूरच्या राजकारणाला अचानक कलाटणी देणारी एक महत्त्वपूर्ण घटना काल घडली. शिवसेना (उबाठा) गटाचे उत्तर महाराष्ट्रातील खंदे समर्थक आणि शिव आरोग्य सेना प्रमुख म्हणून ओळख असलेले डॉ. महेश शिरसागर यांनी काल भारतीय जनता पक्षात जाहीर प्रवेश केला आहे. पालकमंत्री नामदार राधाकृष्ण विखे पाटील यांच्या उपस्थितीत हा प्रवेश सोहळा पार पडला.
नामदार विखे पाटील हे श्रीरामपूर नगरपालिका निवडणुकीच्या अनुषंगाने शहराच्या दौऱ्यावर असताना हा पक्ष प्रवेश झाला. डॉ. महेश शिरसागर यांनी शिव आरोग्य सेनेच्या माध्यमातून रुग्णसेवा, आरोग्य शिबिरे, रक्तदान आणि मोफत वैद्यकीय सेवा देऊन ग्रामीण भागात मोठी लोकप्रियता मिळवली होती. त्यांचे हे सामाजिक कार्य नेहमीच चर्चेत राहिले आहे. त्यांच्या भाजप प्रवेशामुळे आगामी नगरपालिका निवडणुकीची राजकीय समीकरणे बदलण्याची शक्यता राजकीय तज्ज्ञांनी व्यक्त केली आहे.
नामदार राधाकृष्ण विखे पाटील म्हणाले “श्रीरामपूरचा विकास, आरोग्य आणि सामाजिक बांधिलकी या तिन्ही क्षेत्रांमध्ये हा प्रवेश निर्णायक ठरेल. युवकांना नेतृत्व मिळावे आणि सामाजिक कार्याला दिशा मिळावी, या उद्देशाने आम्ही एकत्र आलो आहोत. भाजपच्या माध्यमातून श्रीरामपूरचा विकास अधिक वेगाने होईल.” असा विश्वास व्यक्त केला.
डॉ. महेश शिरसागर यांनी आपले मत मांडताना सांगितले “ही केवळ राजकीय पायरी नाही, तर समाजसेवेच्या कार्याला नवा आयाम देण्याचे पाऊल आहे. जनतेच्या प्रश्नांवर काम करण्यासाठी आणि शासकीय योजनांचा लाभ लोकांपर्यंत पोहोचवण्याच्या हेतूनेच मी हा प्रवेश केला आहे.”
या प्रवेश सोहळ्यानंतर श्रीरामपूर शहर आणि तालुक्यात चर्चाना चांगलेच उधाण आले आहे. प्रस्थापित राजकीय घटकांसाठी हा प्रवेश एक मोठा धक्का मानला जात आहे.
कार्यकर्त्यामध्ये “श्रीरामपूर आता नव्या राजकीय पर्वाकडे वाटचाल करत आहे,” अशी भावना व्यक्त होत आहे. राजकीय वातावरणात बदलाचे संकेत देणाऱ्या या घटनाक्रमामुळे श्रीरामपूरचे राजकारण अधिक रंगतदार आणि स्पर्धात्मक होणार आहे.