‘दुर्बीण’ आडवी आली, पण संगमनेर झुकणार नाही!
◻️ रेल्वे मागणीसाठी आमदार अमोल खताळ विधानभवनात टी-शर्ट, फलक घेऊन धडकले!
संगमनेर LIVE | पुणे - नाशिक रेल्वेमार्ग शिर्डीमार्गे करण्याचा केंद्र सरकारचा निर्णय संगमनेरकरांना मान्य नाही. ‘जीएमआरडी' (दुर्बीण) अडथळ्याचे कारण देत रेल्वेमंत्र्यांनी लोकसभेत या मार्गाची दिशा बदलल्याचे जाहीर करताच, संगमनेरमध्ये संतापाची लाट उसळली आहे. या तीव्र भावनांची दखल घेत शिवसेना महायुतीचे आमदार अमोल खताळ यांनी थेट नागपूरच्या विधान भवनात लक्षवेधी आंदोलन करत सरकारचे लक्ष वेधले.
विधानभवनात 'लक्षवेधी' प्रवेश!
नागपूर येथील हिवाळी अधिवेशनाच्या दुसऱ्या दिवशी आमदार अमोल खताळ यांनी ‘पुणे - नाशिक रेल्वे संगमनेर मार्गेच झाली पाहिजे' असे घोषवाक्य लिहिलेला टी-शर्ट परिधान केला आणि हातात मागणीचा फलक घेऊन विधानभवनात प्रवेश केला. त्यांच्या या 'आगळ्या वेगळ्या' कृतीमुळे विधानभवनातील सर्व लोकप्रतिनिधी आणि कर्मचारी आवाक झाले.
पुणे - नाशिक रेल्वे संगमनेरमार्गे व्हावी या मागणीसाठी अधिवेशन काळात पहिल्यांदा अशा प्रकारे आंदोलन करणारे आमदार खताळ हे पहिले लोकप्रतिनिधी ठरले आहेत. त्यांच्या या कृतीमुळे संगमनेरकर जनतेची मागणी थेट विधिमंडळात पोहोचली असून, राज्यभर त्यांचे कौतुक होत आहे.
राजकारणविरहित ‘जनआंदोलन' करणार
केंद्रीय रेल्वेमंत्री अश्विनी कुमार वैष्णव यांनी हा मार्ग धोकादायक असल्याचे लोकसभेत जाहीर केल्यानंतर संगमनेरकरांच्या भावना अधिक तीव्र झाल्या आहेत.
आमदार अमोल खताळ यावर आपली भूमिका स्पष्ट करताना म्हणाले की, “पुणे-नाशिक रेल्वे मार्ग हा संगमनेर मार्गेच झाला पाहिजे ही जनतेची मागणी आहे. जर कोणी यात आडकाठी आणत असेल, तर त्यासाठी आम्ही जनआंदोलन उभारणार आहोत. जुन्नरचे आमदार शरद सोनवणे यांच्याशी यावर चर्चा झाली असून, ते आणि आम्ही मिळून हे आंदोलन करू.”
तसेच या मागणीत राजकारण आणू इच्छिणाऱ्यांना दूर ठेवत, ज्यांचा हेतू शुद्ध आहे अशांना बरोबर घेऊन राजकारण विरहित जनआंदोलन करण्याची तयारी आमदार खताळ यांनी दर्शवली आहे.