पालकमंत्र्यांच्या हस्ते उद्या संगमनेर तालुक्यात विविध विकासकामांचा शुभारंभ!
◻️ डॉ. सुजय विखे पाटील आणि आमदार अमोल खताळ राहणार उपस्थित
संगमनेर LIVE | संगमनेर तालुक्यातील ग्रामीण भागाच्या विकासाला गती देण्यासाठी उद्या, रविवार दिनांक १ मार्च २०२६ रोजी विविध विकासकामांचा भव्य भूमिपूजन व लोकार्पण सोहळा आयोजित करण्यात आला आहे.
राज्याचे जलसंपदामंत्री तथा अहिल्यानगरचे पालकमंत्री नामदार राधाकृष्ण विखे पाटील यांच्या हस्ते ही महत्त्वपूर्ण कामे मार्गी लागणार आहेत. या सोहळ्याला भाजप प्रदेश उपाध्यक्ष व माजी खासदार डॉ. सुजय विखे पाटील आणि संगमनेरचे आमदार अमोल खताळ यांची प्रमुख उपस्थिती लाभणार असून, यामुळे तालुक्याच्या पायाभूत सुविधांमध्ये मोठी भर पडणार आहे.
या कार्यक्रमाचे मुख्य आकर्षण म्हणजे चंदनापुरी ते शिरापूर या महत्त्वाच्या रस्त्यावर ३ कोटी २४ लाख ७० हजार रुपये खर्चून उभारण्यात येणाऱ्या भव्य पुलाचे भूमिपूजन होय. या पुलाच्या कामामुळे परिसरातील वाहतुकीची मोठी समस्या सुटणार असून, शेतकरी आणि ग्रामस्थांना सुरक्षित दळणवळणाचा मार्ग उपलब्ध होणार आहे.
तसेच, हिवरगाव पावसा येथे निळवंडे प्रकल्पाच्या उर्ध्व प्रवरा उजवा कालव्यावर १ कोटी ३२ लाख रुपये खर्चाच्या ‘सी.आर. कम एस्केप’ या विशेष कामाचे लोकार्पण सायंकाळी ५:३० वाजता करण्यात येईल. या अत्याधुनिक प्रकल्पामुळे कालव्याच्या पाण्याचे नियोजन अधिक शास्त्रीय आणि प्रभावीपणे करणे शक्य होणार असून, याचा थेट फायदा परिसरातील सिंचन क्षेत्राला आणि शेतीला मिळणार आहे.
विकासाची ही मालिका पुढे नेत सायंकाळी ६:३० वाजता रायतेवाडी फाटा व संगमनेर खुर्द येथे बसविण्यात आलेल्या नवीन पथदिव्यांचे लोकार्पण करण्यात येईल. या पथदिव्यांमुळे रात्रीच्या वेळी हा परिसर उजळून निघणार असून, प्रवाशांचा प्रवास अधिक सुरक्षित आणि सुखकर होणार आहे.
या सर्व विकासकामांच्या पार्श्वभूमीवर चंदनापुरी, हिवरगाव पावसा आणि रायतेवाडी परिसरात आनंदाचे वातावरण असून, ग्रामस्थांनी या सोहळ्याचे स्वागत केले आहे. महायुतीचे सर्व पदाधिकारी, कार्यकर्ते आणि नागरिकांनी या ऐतिहासिक विकास सोहळ्यास मोठ्या संख्येने उपस्थित राहावे, असे आवाहन स्थानिक पदाधिकाऱ्यांकडून करण्यात आले आहे.
